Rabas virgi: Prošeaktamielbargi mánáidgárdeprošektii SáMOS - Mánáidgárdefágalaš barggut

Sámedikkis lea rabas virgi prošeaktamielbargin mánáidgárdeprošektii SáMOS - Sámi mánát ođđa searvelanjain.
Álgin lea farggamusat ja virgi lea prošeaktaáigodahkii 2019 - 2023.

Ođas | Almmuhuvvon

Bargosadji lea muhtun Sámedikki kánturbáikkiin gos lea guoros sadji. Dál leat mis guoros sajit Kárášjogas, Guovdageainnus, Gáivuonas, Unjárggas, Skániin, Snoasas ja Divttasvuonas.

Barggut

Prošeavtta ulbmil
Prošeakta SáMOS - “Sámi mánát ođđa searvelanjain” lea ovddidanprošeakta mii galgá nannet kvalitehta sámi mánáidgárddiin. Prošeavtta oaiveulbmil lea čielggadit mii lea sámi mánáidgárdepedagogihka ja didaktihka filosofiija. SáMOS prošeavtta árvovuođđu váldá vuolggasaji sámi kultuvrras, árbemáhtus ja gielas. Sámi mánáidgárdepedagogihka filosofiijai leat vuođđun sámi oahppahábmen, giella, kultuvra ja árbevirolaš máhttu mat leat heivehuvvon ođđa áigái.

Barggut ovttas Árranjoavkkuin
Prošeaktmielbargi galgá prošeavtta SáMOS’a oaiveulbmiliid ja áigumušaid vuođul bargat ja oasálastit Árranjoavkkus, ja leat mielde ovdánahttinproseassaiguin ja dan ektui čađahit bargguid mat doppe mearriduvvojit.

  • Čohkket relevánta dutkamiid ja dieđuid mat gusket sámi mánáidgárddiid- ja mánáidgárddiid rámmaplána sisdollui
  • Hábmet, jođihit ja máhttáhit mánáidgárddiid sámi árvovuođu, pedagogihka ja filosofiija
  • Hábmet giehtagirjji sámi mánáidgárddiide
  • Doalahit oktavuođa ja bargat ovttas sámi mánáidgárddiiguin, eaiggádiiguin,  eiseválddiiguin, dutkiiguin, čehpiiguin árbevirolaš máhtus ja earáiguin
  • Jođihit oahpahusa pilohta mánáidgárddiin mas oahpaheapmi ja bagadallan lea guovddážis
  • Diehtojuohkin prošeavtta ja sámi mánáidgárddi áššiid birra
  • Oainnusmahttit ja čilget gelbbolašvuođa ovddidandárbbu sámi mánáidgárddiin
  • Eará barggut mat gusket prošeavtta sisdollui

Gelbbolašvuohta

Virgái gáibiduvvo oahppu allaskuvllas/ universitehtas vuosttažettiin ovdaskuvlla-/mánaidgárdeoahpaheaddjeoahpus, unnimusat bachelordásis dahje sullasaš oahppu. Áigeguovdilis bargovásáhus sáhttá muhtun muddui buhttet váilevaš oahppogáibádusa.

Muđui gáibiduvvo:

  • Gelbbolašvuohta sámegielas, sihke čálalaččat ja njálmmálaččat
  • Dovdá sámi mánáidgárddiid sisdoalu
  • Praksis sámi mánáidgárddis
  • Dovdá Mánáidgárddi rámmaplána
  • Hárjáneapmi ovdánahttinbarggus sámi mánáidgárddis
  • Dovdá relevánta dutkamiid ja girjjálašvuođa mat gullet sámi mánáidgárddiide 
  • Hárjáneapmi prošeaktajođiheamis
  • Vásáhusat gelbbolašvuođaloktemis mánáidgárddis

Deattuhuvvo:

  • Máhttu sámi servodatdiliid birra
  • Buorit fágalaš kvalifikašuvnnat
  • Buorit gulahallan- ja ovttasbargodáiddut
  • Buorre njálmmálaš ja čálalaš ovdanbuktindáidu
  • Dáidu bargat iešheanalaččat ja ulbmillaččat
  • Veahkkáivuohta
  • Persovnnalaš dohkálašvuohta

Bálká- ja bargoeavttut

Virgi bálkáhuvvo Stáhta regulatiivva mielde virgekodas 1408 vuosttaškonsuleanta dahje 1434 ráđđeaddi, ovdalis vásáhusaid ja gelbbolašvuođa vuođul. Ohcci geas lea erenoamáš gelbbolašvuohta sáhttá biddjojuvvot virgekodii 1364 seniorráđđeaddi.

  • Bálkkás gessojuvvo 2 % Stáhta penšuvdnakássii
  • Buorit loatna- ja penšunortnegat Stáhta penšunkássas
  • Máškidis bargoáigi ja buorit čálgoortnegat
  • Buorre bargobiras mas don leat okta váikkuheddjiin

Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.

Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái. Ohccit geat eai hálddaš sámegiela go virgáduvvojit, sáhttet ovttasráđiid bargoaddiin geatnegahttojuvvot váldit oahpu sámegielas.

Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 % jahkái gitta 25.000 ru rádjai, sii ožžot maiddái sierra vearrogessosa.

Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahčalanáigi.

Oktavuohta

Eanet dieđuid virggi birra oaččut go válddát oktavuođa:

Ohcan

Ohcan, oktan skuvla- ja bargoduođaštusaiguin galgá sáddejuvvot elektrovnnalaččat dán siiddus, liŋka bokte "Oza bargui".

Maŋŋel ohcanáigemeari ráhkaduvvo almmolaš ohcciidlistu. Almmolašvuođalága § 25 vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.

Oza bargui

Ohcanáigemearri

Borgemánu 1. beaivvi 2019

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!