Rabas virgi: Direktevra - Sámediggi

Mii ohcat vitmadis ja doaimmalaš direktevrra jođihit, nannet ja viidáset ovddidit Sámedikki politihkalaš ja hálddahuslaš doaimma.

Sámedikki hálddahus lea sámediggeráđi gaskaoapmi Sámedikki mearrádusaid ráhkkanahttimis ja čađaheamis.

Ođas | Almmuhuvvon , ođasmahtton

Rolla

Sámedikki direktevrras lea rolla mii vástida departemeantaráđiid/ráđđehusráđiid ja Sámediggeráđđi lea lagamus bajimuš politihkalaš orgána. Barggut leat guovtti oasis, vuos lea doaibmat čállingoddin politihkalaš jođiheddjiide ja seammás jođihit ja oktiiortnet hálddahusa ulbmillaš vuogi mielde nu ahte sihkkarastojuvvo buorre čađaheapmi. Virggis ferte lávga ovttas bargat politihkalaš jođiheddjiiguin. Direktevrras lea ráđđeaddi doaibma politihkalaš jođiheddjiid ektui ja sus lea ovddasvástádus das ahte politihkalaš mearrádusat čuovvuluvvojit.

Beaivválaš barggus ferte doallat suittehiid ja fuolahit ahte hálddahus veahkeha politihkkariid nu ahte sii ožžot buori mearrádusvuođu ja ahte politihkalaš mearrádusat biddjojuvvojit doibmii. Dasto galgá direktevra jođihit hálddahusa, fuolahit ahte mearrádusat gaskkustuvvojit ja čađahuvvojit, ja fuolahit ulbmillaš organiseremis, rutiinnain, gelbbolašvuođas ja buori diehtojuohkinrávnnjis.

Gelbbolašvuohta 

Mii ohcat kandidáhtaid geain lea nana servodatáddejupmi ja máhttu sámi servodaga birra. Rivttes kandidáhtas lea relevánta alit oahppu, vuosttažettiin masterdásis, ja nana jođihanvásáhusat. Dasto lea ovdamunni jos lea vásihus politihkalaččat stivrejuvvon doaimmaid jođiheamis.
Deattuhuvvojit maiddái buorit persovnnalaš eavttut virgái ja buorit bohtosat bargoeallimis.
Guoskevaš ohccit gulahallet bures sámegillii, dárogillii ja eaŋgalasgillii.

Bálká- ja bargoeavttut 

Virgi lea jahkemearrevirgi ja virgáduvvo guđa jahkái, ja lea vejolašvuohta oažžut vel nuppi áigodaga.
Virgái álgin 01.09.2020.

Virgi lea biddjojuvvon virgekodii 1062 direktevra ja virgái gáibiduvvo sihkarvuođa čielggadeapmi. Bálká šiehtadusa mielde stáhta jođiheaddji bálkávuogádaga mielde.

  • Bálkkás gessojuvvo 2 % Stáhta penšuvdnakássii
  • Buorit loatna- ja penšunortnegat Stáhta penšunkássas
  • Máškidis bargoáigi ja buorit čálgoortnegat
  • Buorre bargobiras mas don leat okta váikkuheddjiin


Kánturbáiki lea Kárášjogas Sámedikki hálddahusas.

Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.

Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái. 

Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 % jahkái gitta 25.000 ru rádjai, sii ožžot maiddái sierra vearrogessosa.

Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáiggi.

Oktavuohta 

Lagat dieđuid virggi birra addá:

  • Sámediggepresideanta Aili Keskitalo, mobiila +47 971 29 305 
  • Min ovttasbargoguoibmi dán rekrutteremis Experis AS- Solveig Finboe, mobiila +47 958 07 747- Øystein Dahl, mobiila +47 905 68 285

Ohcan 

Ohcan, oktan skuvla- ja bargoduođaštusaiguin galgá sáddejuvvot elektrovnnalaččat dán siiddus, liŋka bokte "Oza bargui".

Maŋŋel ohcanáigemeari ráhkaduvvo almmolaš ohcciidlistu. Almmolašvuođalága § 25 vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.

Oza bargui

Ohcanáigemearri

Guovvamánu 23. beaivvi 2020

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!