Sámi kulturturisma vajálduvvan

Ráđđehus lea ásahan Ovttasbargoráđi kultuvrra ja mátkeealáhusaid várás, nannen dihtii áŋgiruššama kulturturismmain Norggas. Sámediggeráđđi Mariann Wollmann Magga lea beahttašuvvan go son oaidná, ahte lea ásahuvvon lávdegoddi mii galgá addit ráđđehussii rávvagiid kulturturismma birra, almmá ahte sámi mátkeealáhusat ja sámi kulturealáhusat leat mielde mandáhtas.

Ođas | Almmuhuvvon

– Dáin ealáhusain leat stuorra vejolašvuođat ahtanuššat ja ekonomalaččat ovdánit sámi guovlluin. Ollu fitnodagat háliidit geavahit sámi kulturvuđđosa muhtun hámis fitnodaga ovddideamis, ja danne lea deaŧaleappot go goassige ovdal atnit fokusis eaktivuođa ja etihkalaš beali, cealká Magga.

Mariann Wollmann Magga (Foto Åse Pulk-Sámediggi).jpg
FOTO | Mariann Wollmann Magga (foto: Åse Pulk/Sámediggi)

Ovttasbargoráđi kultuvrra ja mátkeealáhusaid várás, mandáhtas fokuserejuvvo ovttasbargu mátkeealáhus- ja kulturaktevrraid gaskka, gávppálaš vejolašvuođain ovdánahttit kulturturismma. Ráđđi galgá buktit cealkámuša das movt sáhtášii nanosmahttit politihka hábmema kultur- ja mátkeealáhussuorggis.

Ráđis leat 17 lahtu. Okta sis lea Maria Utsi Davvi-Norgga riemuin.

– Lihkus lea Maria Utsi, geas lea gelbbolašvuohta sámi kulturealáhusaid siskkobealde, mielde joavkkus, muhto mun oaivvildan ahte mandáhta gal lea láivi, dadjá Magga.

– Maŋŋá go lean searvan Grüne Woche meassuide, máilmmi stuorámus biebmomessui, de ledje mus stuorát vuordámušat ráđđehusa viidáset bargui go dat mii dál lea duohtavuohta, šuohkiha Magga loahpas.

Jos áiggut jearahallama, de váldde oktavuođa sámediggeráđiin Mariann Wollmann Maggain, mob. 977 02 350.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!