PRD: Vuosttilda doaibmalobi Nussirii

– Mii vuosttildat ahte mineráladirektoráhta dohkkeha doaibmalobi Nussir-ruvkii, dadjá sámediggeráđđi Inger Eline Eriksen Fjellgren.

Ođas | Almmuhuvvon

Mineráladirektoráhta sáddii geassemánu 21. b. gulaskuddamii Nussir ASA ohcama oažžut doaibmalobi Riehppovuona veaikeruvkii. Gulaskuddanáigemearri lei čakčamánu 1. beaivvi. Sámediggi lea cealkámušastis Direktoráhtii čujuhan ahte minerálalága ja olmmošvuoigatvuođalága mielde galgá mearkkašahti láhkai deattuhit sámi kultuvrra sin árvvoštallamiin. Sámediggi oaivvilda ahte dakkár stuorra sisabahkken gáibida ahte Sámediggi ja orohagat ovddalgihtii mieđihit sorjjasmeahttumit.

Inger Eline Eriksen Fjellgren (Foto- Jan Roger Østby, Sámediggi).jpg
FOTO | Inger Eline Eriksen Fjellgren (foto Jan Roger Østby/Sámediggi)

– Doaibmalohpi leat nu stuorra vahágin guolásteapmái ja boazodollui, ahte dat hehtteha sámi ealáhusaid dan guovllus. Prošeakta ii leat gánnáhahtti servvodatekonomalaččat, ii ge leat orohat ii ge Sámediggi konsultašuvnna vuođul mieđihan doaimmaide ovddalgihtii. Daid sivaid geažil ii sáhte doaibmalohpi addot, dadjá sámediggeráđđi Fjellgren.

Minerálalága vuođul sáhttá biehttalit addimis doaibmalobi sámi beroštumiid geažil. Go Sámediggi dahje FeFo vuosttildit doaibmalobi, de galgá departemeanta mearridit ášši. Sámediggi lea gulaskuddancealkámušas albmaláhkái árvvoštallan dan riektevuođu man mielde doaibmabiju galgá meannudit, ja makkár váikkuhusat das leat sámi kultuvrii ja servodahkii, birrasii, guolásteapmái ja boazodollui.

– Go Direktoráhta dál ferte sáddet ášši departementii mearrideapmái, de vuorddán ahte departemeanta dahká vuđolaš álbmotrievttálaš árvvoštallamiid doaibmabijus. Mii áigut váruhit ahte sii leat gozuid alde dán áššis. Sii galget minguin konsulteret albma láhkai jus sii oaivvildit ahte dás sáhttá addit lobi. Lean sihkar ahte ii šatta Nussir-ruvkkes mihkkege nu guhká go mus leaš dadjamuš áššis, loahpaha sámediggeráđđi Inger Eline Eriksen Fjellgren.

Jus áiggut jearahallama, de váldde oktavuođa Inger Eline Eriksen Fjellgrenain, mob. 414 58 703.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!