PRD: Sámediggái mieđihuvvui - Ráđđehus rievdada oainnu

Dálkkádat- ja birasministtar Vidar Helgesen lea almmuhan ahte maŋiduvvo ođđa láhkaásahus buhtadusa birra boraspire goddán bohccuid ovddas.

Reindrift-C-Aina-Bye_mainimage.jpg
FOTO | Boazodoallu/Reindrift - Foto- Aina Bye

Ođas | Almmuhuvvon , ođasmahtton

– Máŋga jagi lea Dálkkádat- ja birasdepartemeanta geahččalan rievdadit dálá buhtadusortnega daid bohccuid ovddas mai ráfáidahttojuvvon boraspiret leat goddán. Maŋŋá maŋidemiid ja gulaskuddamiid lea departemeanta dál jierbman ja guldalan boazosápmelaččaid ja Sámedikki, dadjá sámediggeráđđi Mariann Wollmann Magga (Bb).

Loga eanet Dálkkádat- ja birasdepartemeantta mearrádusa birra (dárogillii).

Sámediggi lea čujuhan dasa ahte ođđa láhkaásahusevttohus lea vuođđuduvvon váilevaš máhttovuđđui ja boađusin das sáhttá leat ahte boazoeaiggádat eai oaččo dievas buhtadusa. Váilivuođat gusket erenoamážit máhttui boraspiremáddodaga ja boraspirevahágiid birra. Máhttovuođđun lea vuosttažettiin biddjojuvvon dieđalaš máhttu ja dasa gullet Rovbase ja Reinbase dieđut ja dieđut mat leat háhkkojuvvon iešguđet dutkama bokte. Sámi árbediehtu ii leat geavahuvvon oassin máhttovuđđui.

31556706076_26bc95b9e1_k.jpg

Go boazodoalu vásáhusvuđot máhttu váilu dálá máhtus, de lea Sámediggi čujuhan ahte ferte álggahit barggu mii systematisere ja kvalitehtasihkkarastá boazodoalu sámi vásáhusvuđot máhtu. Sámediggi lea bivdán ahte láhkaásahus ferte maŋiduvvot dassážiigo dát bargu lea čađahuvvon ja váldojuvvon mielde ođđa buhtadusortnega máhttovuđđui.

– Sámediggeráđđi Mariann Wollmann Magga háliida maid rámidit Norgga Boazosápmelaččat Riikkasearvvi (NBR) mii seamma láhkai go Sámediggi lea čuoččuhan dan gáibádusa ahte háhkat boazodoalu iežas máhtu ja bivdá ahte láhkaásahusbargu bissehuvvo.

– Lea illudahtti go ráđđehus dál dovddasta ahte Sámediggi ja NBR leat deaŧalaš ovttasbargobealit ja maŋida barggu ođđa buhtadusortnegiin. Mii leat duhtavaččat go Dálkkádat- ja birasministtar Vidar Helgesen deattuha ahte vásáhusvuđot máhttu maid galgá leat mielde dan barggus ahte ođasmahttit máhttovuođu ja ahte go Sámediggi ja NBR galget váldojuvvot mielde dán bargui, dadjá sámediggeráđđi Mariann Wollmann Magga.

– Sámediggi vuorddaša dál mielas bargat ovttas Dálkkádat- ja birasdepartemeanttain ja boazodoaluin oažžun dihtii einnostanvejolaš ja vuoiggalaš buhtadusortnega daid bohccuid várás maid boraspiret leat goddán, loahpaha Wollmann Magga.

Jus áiggut jearahallama, riŋges sámediggeráđđái Mariann Wollmann Maggai, mob. 977 02 350

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!