PRD: – Go Fovsen-Njaarke sápmelaččat vuoittáhalle, de lea stáhtas ain stuorát ovddasvástádus lullisámi kultuvrra seailluheamis

Fovsen-Njaarke lullijoavku ii juksan mieđiheami árvvoštallanrievttis bissehit bieggafápmorusttega huksenplánaid Storheias.

Ođas | Almmuhuvvon , ođasmahtton

Morašlaš riektemearrádus olles lullisámi kultuvrii ja gillii. Fovsen lea okta stuorámus bieggafápmorusttethuksemiid ja mielddisbuktá stuorra negatiiva váikkuhusaid guovllu boazodollui, dadjá sámediggepresideanta Vibeke Larsen.

Vibeke Larsen (foto - Åse Pulk, Sámediggi).jpg

Sámediggepresideanta Vibeke Larsen (foto - Åse Pulk, Sámediggi)

Fovsen guovllu lullisámit ballet ahte bieggamillopárkkat dagahit ahte Fovsen boazodoalu nohká. Ain lea guovllu boazodoallu hui deaŧalaš lullisámegiela ja lullisámi kultuvrra seailluheapmái. Nu go mii diehtit de atne ON lullisámegiela okta dain eanemusat áitojuvvon gielain máilmmis.

– Sámediggi lea moaitán ja ain moaitá bieggafápmohuksema Fovsen njárggas go das sáhttet leat stuorra negatiiva váikkuhusat lullisámi kultuvrii. Stáhtas lea ovddasvástádus das ahte kultuvra lea ealaskas ja ceavzil. Go stáhta eiseválddit dál lea suovvan dan stuorra bieggamillohuksema, de sii leat bidjan ain stuorát ovddasvástádusa sihkkarastit ahte boahttevaš huksemat guovllus eai eanet hedjonahte boazodoalu birgenlági, dadjá Larsen.

Buot boahttevaš huksemiid oktavuođas fertejit eiseválddit, plánejeaddjit ja huksejeaddjit bidjat álbmotrievttálaš eavttuid vuođđun. Dan ollašuhttimii fertejit viežžat miehtama boazodolliin ovdalgo adde lobi ođđa sisabahkkemiidda. Dalle eastadivčče eanet sisabahkkemiid deaŧalaš guohtuneatnamiidda mii lea mearrideaddji eaktun lullisámi boazodoalu seailluheapmái.

– Jus stáhta ii lihkostuva dainna, ii ge nagot dahje háliit bissehit guohtuneatnamiid goarideami, de šaddet Fovsen guovllu lullisámiid sánit duohtan. Dalle massá rašis lullisámi kultuvrra ceavzilvuođas, ja stáhta ferte váldit badjelasas ovddasvástádusa das ahte jávkaduvvo okta máilmmi eanemusat áitojuvvon gielain, dadjá Larsen.

Jearahallama várás, váldde oktavuođa sámediggepresideanttain Vibeke Larsen, mob. 941 30 116.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!