Duhtavaš go oktiilokaliseren galgá dál čielggaduvvot

Sámediggeráđđi Mariann Wollmann Magga lea duhtavaš go ráđđehus dál lea positiiva árvvoštallat Beaivváš sámi našunálateáhtera ja Sámi joatkkaskuvlla ja boazodoalloskuvlla oktii lokaliserema. Son vuordá ahte dát čuovvoluvvo ruđain.

Ođas | Almmuhuvvon

Maŋemus ráđđehuskonferánssas lea ráđđehus mearridan addit Kulturdepartementii ja Máhttodepartementii oktasaš bargun ja geavahit Statsbygga ráhkadit ollislaš mearridanvuođu oktiilokaliseremii, vuordámušain ahte konkrehta čađahaniskkadeapmi lea gárvvis dán jagi lohppii. Dan ovdanbuvttii Eurohpáministtar Frank Bakke Jensen preassakonferánssas Guovdageainnus odne.

Mariann W. Magga (Foto Åse M.P. Pulk-Sámediggi).jpg
FOTO | Mariann Wollmann Magga (foto: Åse Pulk/Sámediggi)

– Mii leat duhtavaččat dainna ahte ráđđehus dál lea mearridan čielggadit oktiilokaliserema viidáseappot, muhto vuordit ahte dát čuovvoluvvo ruđain bušeahtas, sihke huksemii ja viessoláigoruhtadeapmái, dadjá sámediggeráđđi Mariann Wollmann Magga.

Mearrádus boahtá maŋŋel go Statsbygg Sámedikki bargogohččuma vuođul lea iskan makkár vejolašvuođat leat oažžut Beaivváš sámi našunálateáhterii ođđa teáhterviesu. Čađahaniskamuša konklušuvnna ja rávvema vuođul mearridii Sámediggi doarjut ođđa viesu ovttas Sámi joatkkaskuvllain ja boazodoalloskuvllain, ja jus dat ii leat vejolaš, de sierra, veahá smávit viesu Beaivvážii.

– Sámediggeráđđi doarju čađahaniskamuša konklušuvnna ahte sámi joatkkaskuvlla ja boazodoalloskuvlla ja teáhtera oktii lokaliseren lea ulbmilleamos ja attášii eanemus positiiva doaibmavejolašvuođa, dadjá Mariann Wollmann Magga.

Jus leat gažaldagat, váldde oktavuođa sámediggeráđiin Mariann Wollmann Maggain, mob. 977 02 350.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!