Doarju julevsámi kártenávdnasiid almmuheami

Sámediggeráđđi lea juolludan ruđaid Iđut lágádussii almmuhit julevsámegillii Giella 2 ja Giella 4, mat galget geavahuvvot 2- ja 4-jahkásaš mánáid giela kártet.

Ođas | Almmuhuvvon , ođasmahtton

Lea juolluduvvon gitta 93 000 ruvnnu rádjai almmut julevsámegillii Erna Horn & Astrid L. Dalin čállosa: Språk 2 - Kartlegging av barnets språk ved 2-årskonsultasjonen på helsestasjonen, ja gitta 85 000 ru almmuhit julevsámegillii Erna Horn & Astrid L. Dalin čállosa: Språk 4 - Kartlegging av barnets språk ved 4-årskonsultasjonen på helsestasjonen.

Giellaiskkadeamit/kártenávdnasat galget veahkehit kártet máná giela go mánná boahtá dearvvašvuođastašuvdnii 2- ja 4-jagi-iskkadeapmái. Prošektii gullet kártenskovit ja geavaheaddjibagadus.

Lars Filip Paulsen (Foto Åse Pulk, Sámediggi).jpg
FOTO | Lars Filip Paulsen (foto: Åse Pulk/Sámediggi)

– Sámediggi oaidná ahte dárbbašuvvojit kártenávdnasat julevsámegillii, dadjá Sámedikki várrepresideanta Lars Filip Paulsen. Earret eará lea Divtasvuona suohkan jearahan giellaiskosiid julevsámegillii.

Sámediggi lea ovdal addán doarjaga jorgalit ja heivehit kártenávdnasiid davvisámegillii ja lullisámegillii.

– Juksan dihtii ovttadássásašvuođa ja dásseárvvu gielaid gaskkas ja vai julevsámi mánáin galgá leat seamma vuoigatvuohta sin giellaoahppama ovddiduvvot, kártejuvvot ja iskojuvvot, oaidná Sámediggi dárbbašlažžan ahte kártenávdnasat leat maiddái julevsámegillii, dadjá Paulsen.

Iđut lágádus galgá sihkkarastit ahte giellaiskkus vuovdaluvvo ja juhkkojuvvo sámi geavaheddjiide.

Eanet dieđuid addá várrepresideanta Lars Filip Paulsen, mob. 916 18 561.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!