– Buori ovttasbarggu dihtii leat lihkostuvvan

Sámediggeráđđi Inger Eline Eriksen Fjellgren oaivvilda sámi servodaga lihkostuvvan oažžut sadjái Duohtavuođakommišuvnna go leat nu bures ovttasbargan.

Inger Eline Eriksen Fjellgren, Sara Ellen Anne Eira, Risten Turi Aleksandersen.jpg
FOTO | Sámi girkoráđi jođiheaddji Sara Ellen Anne Eira, sámediggeráđđi Inger Eline Eriksen Fjellgren ja Sámi girkoráđi váldočálli Risten Turi Aleksandersen

Ođas | Almmuhuvvon

Stuoradiggi mearridii ikte ásahit Duohtavuođa- ja soabadankommišuvnna, mii galgá guorahallat dáruiduhttinpolitihka váikkuhusaid Norggas. Sámediggeráđđi Inger Eline Eriksen Fjellgren čuovui dán ášši digaštallama Stuoradikkis ja son lea hui duhtavaš dáinna mearrádusain.

– Sámedikkis lea leamaš buorre ovttasbargu ollugiiguin ja danne leat lihkostuvvan oažžut sadjái kommišuvnna.

Ráhkadan oktasaš strategiija

Fjellgren namuha erenoamážit ovttasbargu Sámedikki vuorrasiidráđiin.

– Sámediggi lea giitevaš dan ovddas maid Sámedikki vuorrasiidráđđi lea bargan dán áššis máŋggaid jagiid badjel. Erenoamáš buorre lei go sii serve rabas gulaskuddamii Stuoradikkis. Lei mávssolaš ahte Stuoradiggi beasai gullat maid eallilan olbmot leat vásihan ja mo leat ferten gillát stáhta politihka geažil. 

Sámediggeráđis Fjellgrenas lei árrat juo čoahkkin Trygg Jakolain Norgga Kveanalihtus. Doppe ráhkadeigga ovttasráđiid strategiijaid mo oažžut dákkár kommišuvnna. Sámediggi sáddii dán čoahkkima maŋŋel reivve fylkkagielddaide sámi guovllus gos bivddii sin doarjut kommišuvnna ásaheami, ja nu leatge dahkan maŋŋil.

Girku doarjja stuora ávkin

Sámediggi lea maid olu gulahallan Sámi girkoráđiin, ja sin doarjja lea leamaš stuora ávkin.

– Girku ja stáhta leaba aitto earránan. Girkus lea ain dehálaš sajádat sihke Sámis ja muđui Norggas, ja maiddái stuoradiggeáirasiid gaskkas. Sápmelaččat atnet árvvus go girku doarju min dán barggus. Mii fertet muitit maiddái dikšut dan vuoiŋŋalaš oasi dán soabadanbarggus. Girkus lea dása dat máhttu mii gáibiduvvo, lohká Fjellgren.

Jus áiggut jearahallama, de váldde oktavuođa sámediggeráđiin Inger Eline Eriksen Fjellgreniin, mob. 414 58 703.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!