Álbmotregistaris sáhttá registreret sámegielaid

Álbmotregistaris galgá leat vejolaš registreret hállá go sámegiela. Dat lea Sámedikki ja Finánsadepartemeantta gaskasaš konsultašuvnnaid boađus. Sámedikki presideanta Vibeke Larsen lea duhtavaš dainna.

Vibeke Larsen (foto Åse Pulk-Sámediggi).jpg

Vibeke Larsen (foto Åse Pulk-Sámediggi)

Ođas | Almmuhuvvon

Gielaid registreren Álbmotregistaris lea dehálaš dan ektui ahte beassá čuovvut sámi gielaid ovdáneami Norggas.

– Sámegielaid registreren addá buoret vuođu ulbmillaš doaimmaide ja bálvalusaide mat nannejit sámi gielaid Norggas, dadjá Larsen.

Álbmotregisttarlágas lea mearriduvvon ahte sámegielat galget leat mielde Álbmotregistaris. Ikte lei Sámedikkis konsultašuvdna finánsadepartemeanttain ođđa álbmotregisttarláhkaásahusaid ja sámegielaid registrerema birra Álbmotregistaris, gulaskuddanárvalusa oktavuođas.

Sámediggi lea guhkes áiggi čujuhan ahte lea dárbu statistihkalaš ávdnasiidda ja máhttui sámi giellaovdáneami birra Norggas. Guovddáš eiseválddiid beales leat ollu gerddiid čujuhan bargui ođđa álbmotregisttarlágain ja maid ođđa teknihkalaš čovdosat buktet. Dát láhkarievdadus buorida sámi giellaovdáneami registrerema.

Dán vuođul álggahii Sámediggi konsultašuvnnaid Finánsadepartemeanttain 2015:s. Konsultašuvnnaid ulbmilin lei rahpat vejolašvuođa registreret sámegiela indiviidadásis álbmotregistaris. Sámediggái lea dál mieđihuvvon ahte galgá sáhttit registreret sámi gielaid. Registreren galgá guoskat davvi-, julev- ja máttasámegillii.

– Gielladieđut Álbmotregistaris leat maiddái ávkkálaččat dieđalaš dutkamii sámi gielladiliid birra ja nu leat dehálaš oassin giellapolitihkalaš barggu diehtovuođus, dadjá sámediggepresideanta Vibeke Larsen.

Jus áiggut jearahallama, riŋges sámediggepresidentii Vibeke Larsenii, mob. 941 30 116.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!