PRM: Doarju mátkeealáhusovddideami Unjárggas

Sámediggeráđđi juolluda 400 duhát ruvnnu Vesterelvjenta AS:ii Unjárggas ovddidit ja ásahit idjadanfálaldaga turistavásáhusaid várás Várjavuonas. –Kultur- ja vásáhusvuđot turisma sáhttá váikkuhit ovdáneami sámi guovlluin, dadjá sámediggepresideanta Vibeke Larsen.

Ođas | Almmuhuvvon

 

vibekelarsen_plenum.jpg

 

Fitnodaga eaiggát Edgar Olsen lea logijagi áigodaga doaimmahan mearrabivdoturismma mearrasámi gielddas Unjárggas. Son háliida hukset guokte allastandárdda bartta oktan sávnniin fállan dihtii idjadeami daidda gussiide geat bohtet oaggut vuonas ja vásihit Várjavuona.

-Dat ahte sáhttit fállat gussiide ollislat buvttapáhka sihke vásáhusaiguin ja idjademiin, buorida gánnáheami, dadjá sámediggepresideanta Vibeke Larsen.      

Larsen dadjá ahte fitnodagas Vesterelvjenta AS leat buorit vejolašvuođat lihkostuvvat viiddidemiin go sis leat guhkesáiggi vásáhusat mátkeealáhusdoaimmain ja márkan jearaha vásáhusvuđot turismma.

-Sámediggi áigu máhcahit eretfárrema sámi guovlluin. Dat ahte oččodit máŋggabealat ealáhuseallima ja bargosajiid erenoamážit nuoraide, lea hui deaŧalaš dasa ahte lihkostuvvat dainna, dadjá Larsen. Go ovttastahttá kulturealáhusaid, hutkáivuođa, mátkeealáhusa, báikkálaš biepmu ja nana vuođđoealáhusa, de dat addá ovdánanvejolašvuođa. Dát ealáhusat sáhttet váikkuhit positiiva ealáhus- ja servodatovdáneami sámi guovlluin boahtteáiggis, dadjá Larsen.

Eanet dieđuid addá: Sámediggepresideanta, Vibeke Larsen, 941 30 116

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!