Lohkkiidčálus: Ofelaš Guovdageainnus

Sáhttá dušše govahallat man lossat nuorra boazodoallái Jovsset Ánte Sarai (25) lea leamaš gižžudit birgejumis ovddas Norgga stáhta vuostá, čállá Sámedikki presideanta.

31594277465_71898853e7_k.jpg

Ođas | Almmuhuvvon , ođasmahtton

Lohkkiidčálus Sámedikki presideanta Vibeke Larsen bokte, deaddiluvvon Nordlys-áviissas njukčamánu 22. b. 2017.

Dát nuorra Guovdageainnu boazodoalli ceggii ášši stáhta vuostá maŋŋá go Eanadoallo- ja biebmodepartemeanta lei mearridan ahte son ferte unnidit boazologu 150 bohccos 75 bohccui. Jovsset Ánte Sara lea oppa áiggi čujuhan ahte son ii birge go nie ollu šaddá geahpedit, maid maiddái diggeriekti doarjjui. Muhto stáhta guoddalii duomu ja mannán bearjadaga (17.03.17) čielggai ahte Sara vuittii lágamannerievttis.

Hålogalándda lágamanneriekti bijai vuođđun ahte ii leat vejolaš birget ekonomalaččat go leat dušše 75 bohcco, ja ahte departemeantta mearrádus dieinna lágiin rihkku Sara vuoigatvuođa bargat iežas kultuvrrain, ON siviila ja politihkalaš vuoigatvuođaid konvenšuvnna ektui. Lágamanneriekti lea maiddái čielggas das ahte gávdno rádji man stuorra lihkahallamiid stáhta sáhttá dahkat ovttaskas indiviida eallimis – ja ahte rádji rasttilduvvui Jovsset Ánte Sara áššis. 

Maŋŋá 150 jagi dáruiduhttimiin ja boazodoalu reguleremiin earáid eavttuid mielde, lea viimmat nannejuvvon ahte doalli vuoigatvuohta iežas kultuvrii lea gustovaš prinsihppa, ja ahte earáid dárbu reguleret boazodoalu boahtá nubbin. Boazodoalloláhka iešalddis lea manifeasta stáhta dárbui reguleret boazodoalu earáid dárbbu ja eavttuid vuođul. Dán duomu vuođul ferte boazodoallolága rievdadit nu ahte dat dávista riikkaidgaskasaš konvenšuvnnaide ja olmmošvuoigatvuođaide, maiddái ON siviila ja politihkalaš vuoigatvuođaid konvenšuvnna 27. artihkkalii, mas válddahuvvo vuoigatvuohta bargat iežas kultuvrrain ovttas sin joavkku eará lahtuiguin.

Historjá, nuorra boazodoalli birra lea fuomášuvvon miehtá riika ja duopmu bidjá áigeráji dasa, goas mii sáhttit hállat ovdal ja maŋŋá Sara duomu. Lágamanneriekti lea dainna duomuin nannen ahte ON siviila ja politihkalaš vuoigatvuođaid konvenšuvnna 27. artihkal suodjala indiviida rievtti bargat iežas kultuvrrain. Politihkalaččat leat láhkaaddit dulkon nu ahte álgoálbmogiin lea vuoigatvuohta bargat iežas kultuvrrain ovttas earáiguin joavkodásis.

Hålogalándda lágamannerievtti duomus lea mearkkašupmi maiddái ollu eará áššiide; duohtadanáššiide, regulerenáššiide, áššiide mat válddahit giela ja sámi mánáidgárdefálaldaga. Sáhttá go stáhta ain joatkit ná ja reguleret du rievtti eret bargat du kultuvrrain?

Norgga stáhta lea dán proseassas bidjan 25-jahkásaš Jovsset Ánte Sara guoddit olmmošmeahttun noađi. Okta lea sáhttit váldit eret vejolašvuođa birget boazodoaluin, nubbi eará lea ahte ferte váldit David vuostá Goliat-gičču norgga stáhta vuostá nu árrat eallimis. Jovsset Ánte Sara lea čájehan gutnálašvuođa ja gievravuođa dán áššis. Ollu eará nuorra sámiid ovddas geat háliidit ásahit boazodoalus, lea son gižžudan ja buktán áššis ovdan sihke čielgasit ja mearálaččat. Son háliidii dušše bisuhit birgejumi mii bearrašis lea leamaš sohkabuolvvaid – ja son vuittii. Ii leat dušše Jovsset Ánte gii vuittii, duopmu lea prinsihpalaš vuoitu olles sámi álbmogii.

Filmmas “Ofelaš” 1987:s oažžu váldopersovdna filmma loahpas gutni doaibmat siidda ođđa ofelažžan. Hålogalándda lágamannerievtti duopmu šaddá min ofelažžan. Giitu Jovsset Ánte Sara go leat leamaš nu duostil! Mii dárbbašit eanet diekkár jienaid ja mii dárbbašit ámadaju daid hástalusaide maid ovddabealde mii leat. Don leat ovdagovvan midjiide buohkaide. Ollu giitu!

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!