Geigii bálkkašumi birasdiđolaš nuoraide

Sámediggeráđđi Mariann Wollmann Magga lei hui hirpmástuvvan man čeahppi Girkonjárgga joatkkaskuvlla nuoraidfitnodat lei, mii oaččui Sámedikki bálkkašumi stuorámus árvoháhkanvejolašvuođas Nuorra hutkan fylkkameassus.

Beste verdiskapingspotensial_nyest.jpg

Govven/foto: Ungt Entreprenørskap Finnmark

Ođas | Almmuhuvvon

Sámedikki bálkkašupmi stuorámus árvoháhkanvejolašvuođas geigejuvvui fylkkameassus Nuorra hutkan 2017 gaskavahku njukčamánu 1. b., gos nuoraidfitnodagat miehtá Finnmárkku ledje čoagganan Amfi Áltái.

Čieža searvan fitnodaga gaskkas, manai vuosttaš bálkkašupmi nuoraide Erik Guldbrandsen, Karin Boine ja Tor Even Millehaugen fitnodagas Miljøkrutonger UB, mii lea nuoraid fitnodat Girkonjárgga joatkkaskuvllas. Fitnodat vuovdá krutoŋggaid mat leat ráhkaduvvon báikkálaš buvddaid láibebázahusain, mat livčče muđui bálkestuvvon.

Jurya dadjá čuovvovaččat vuoiti birra:

«Evttohasfitnodat lea sádden buori čálalaš, dárkilis čilgehusa iežas fitnodaga birra, mas lea čielga sátta ja čalmmusteapmi iežas buktagis. Jurdda čujuha birasdiđolažžii, resursa ođđasis geavaheapmái – ráhkadit buktaga bázahusain herskon. Buvtta lea biddjojuvvon buvttadeapmái, geahččaluvvon ja vuvdojuvvon ollu gerddiid – nappo čielga lihkostuvvan! Sii ožžo bajimuš čuoggáid buot indikáhtoriidda ja buktagis lea máilmmiviidosaš vejolašvuohta”.

Sámediggeráđđi Mariann Wollmann Magga jođihii jurya, ja son rápmo fylkka čeahpes nuoraid.

– Ledje ollu buorit evttohasfitnodagat ja jurya bargu lei gáibideaddji, muhto maiddái hui somá. Mii leat hirpmástuvvan govdodaga fitnodagaid gaskkas, main lea leamaš máŋggalágan kvalitehtat iešguđege surggiin, dadjá Magga.

Vuosttaš bálkkašupmi lei diploma ja 600 ruvnnosaš vuitu.

Bálkkašupmi mediagründáriidda

Jurya, mas ledje muđui mielde Birgit Haugland (Aksis), Kjetil Kristensen (Álttá ealáhussearvi) ja Geir Ove Bakken (FFK), geigii maiddái nuppi bálkkašumi nuoraidfitnodahkii Varangian UB Čáhcesullo joatkkaskuvllas, mas ožžo diploma ja 400 ruvnnosaš vuoittu. Fitnodat bargá mediabuvttademiin, ja fállá bálvalusaid nugo buvttafoto, logot ja máinnusfilmmaid buvttadeapmi.

Jurya mielas leat nuorat buorit grundárat geat fállet ođđa teknologiijavuđot buktaga ođđa márkanii. Dasa lassin lea čájehan ahte fitnodagas lea árvoháhkanvejolašvuohta, go lea juo dinegoahtán ruđaid buktagis, ja nuorat leat čájehan nana searaid barggusteaset.

 Mun sávan fitnodagaide lihku bálkkašumiin ja boahtteáiggiin, dadjá juryjođiheaddji Mariann Wollmann Magga loahpas.

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!