Finnmárkku buohcciviessu geahpeda sámi dearvvašvuođabálvalusa psyhkalaččat buohcci divššohasaide

Garra beahttašuvvamiin oaidná Sámedikki ráđis  ahte Finnmárkku buohcciviessu lea mearridan heaittihit 10 virggi fáhkka ambuleanta joavkkus psykiátralaš dearvvašvuođas gokčan dihtii doaimma vuollebáhcaga, ja ahte olles gávccis dain virggiin heaittihuvvojit dain guovlluin gos bálvalit eanemus buhcciid, earret eará SÁNAG:s. Fáhkka-joavkkut leat jurddašuvvon dakkár fálaldahkan maid lea álki oažžut, mas buohccit ožžot johtilit veahki almmá dan haga ahte doavttir čujuha sin dohko. Dát joavkkut addet maid buhcciide veahki sin lagasbirrasis nu ahte sii eai dárbbaš lágiduvvot buohccin ásahussii.

Ođas | Almmuhuvvon , ođasmahtton

-Mii leat sakka fuolastuvvan fálaldaga geažil sámi buhcciide, dadjá Sámedikki presideanta Vibeke Larsen. Erenoamážit go eará fálaldagat Finnmárkkus ja riikkas muđui eai leat láhčán sámegiela ja kulturmáhtu geavaheapmái. Seammás mii oaivvildit ahte lea hui eahpegovttolaš ahte SÁNAG ja fálaldat sámi buhcciide Finnmárkkus galgá gillát stuorámus oasi seastimis.

DSC_1268.JPG

Sámediggi lea, ovttas Davvi Dearvvašvuođain ja guovddáš eiseválddiiguin, bargan máŋga jagi ovddidemiin dearvvašvuođabálvalusaid sámi buhcciide. Dan boađusin lea SÁNAG ásaheami stáhta ruđaiguin.

SÁNAG lea šaddan psyhkalaš dearvvašvuođa ja gárrenmirkkuid ofelažžan ja lea rámiduvvon sihke riikka siste ja riikkaidgaskasaččat. Earret eará oaidnit ahte min ránnjáriika dahká šiehtadusaid Davvi Dearvvašvuođain vai ožžot ávkki SÁNAGa gelbbolašvuođas. SÁNAGas lea maid fálaldat riikka eará osiid sámi buhcciide, ja guovddáš eiseválddit ja earát čujuhit SÁNAGii go dárbbašuvvojit doaibmabijut ja veahkki dakkár váttis áššiin go “Divttasvuona áššis”.  Go Finnmárkku buohcciviessu billista SANAG, de lea veadjemeahttun ollašuhttit daid vuordámušaid mat mis leat SÁNAGii ja sin bargamušaide.

Son čujuha maid dasa ahte Davvi Dearvvašvuohta lea addán Finnmárkku buohccivissui erenoamáš ovddasvástádus das ahte sihkkarastit bálvalusfálaldaga sámi buhcciide, muhto orru leamen nu ahte Finnmárkku buohcciviesus ii lea ii dáhttu ii ge nákca fuolahit sámi buhcciid.

Sámediggeráđđi gávnnaha ahte Finnmárkku buohcciviesu easkabáliid mearrádus lea joatkkan ovddeš čovdosiidda ja proseassaide mat mielddisbuktet sámi dearvvašvuođabálvalusaid geahpedeami.

-Sámedikki bealis mii fertet šállošit go min luohttámuš Finnmárkku Buohccivissui dál lea sakka hedjonan, dadjá Sámedikki presideanta Vibeke Larsen, ja loahpa dainna ahte dál lea áigi árvvoštallat eará organisašuvdnačatnaseami sámi spesialistadearvvašvuođabálvalusa várás.

 

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!