PRD: Sámediggeráđđi lea dál juolludan badjelaš 20,1 miljovnna ruvnno oahpponeavvuide

Sámediggeráđđi lea dál juohkán badjelaš 20,1 miljovnna ruvnno oahpponeavvuid ráhkadeapmái. Okta suorgi masa leat vuoruhan doarjaga dán jagi leat oahpponeavvut nubbingielagiidda lulli- ja julevsámegillii. Sámediggeráđđi lea addán doarjaga ráhkadit oahpponeavvuid lullisámegillii, sierralágan giellaoahppanmetodihkka vuođul mii beavttálmahttá nuppigiela ohppiid doaibmi guovttegielalažžan. Mii guoská davvisámegillii, de leat addán doarjaga ráhkadit mobiilabihtáid nuppegielagiidda davvisámegillii, mii lea ávkin beavttálmahttet davvisámegiela nubbingielagiid giellaoahpu.

Ođas | Almmuhuvvon

Sámediggeráđđi oaidná ja vásiha ahte sihke davvi-, lulli- ja julevsámegielat leat erenomáš hearkkes dilis. - Mii leat duhtavaččat go mii dán jagáš bušeahtas leat sáhttán addit doarjagiid mat ovddidit giellaoahpahusa, nanusmahttet mánáid ja nuoraid lohkama ja mat dasa lassin leat heivehuvvon sidjiide geain leat erenoamáš dárbbut giellaoahpahusa oahpponeavvuide, dadjá sámediggeráđđeláhttu Mikkel Eskil Mikkelsen.

- Mii guoská lullisámegillii de leat doarjagiid bokte viimmat olahan mihttomeari buvttadit visogokči oahpponeavvuid lullisámegielas vuosttašgiellan nuoraidskuvlla dássái, illuda Mikkelsen. -Mii leat vuoruhan oahpponeavvuid mat gusket lohkanhárjehallamii julev- ja lullisámegillii, ja addán doarjaga ráhkadit álkeslohkangirjjážiid lullisámegielas joatkkaskuvlla dássái. Lohkangirjjážiin lea čielga progrešuvdna ja dássejuohkin, mat lea ávkkálaččat lohkanhárjehallamis, joatká Mikkelsen.

Sámediggeráđđi oaidná maid deaŧalažžan vuoruhit oahpponeavvuid duojis nannen dihte ja viidásit fievrridit sámi kultuvra ja –árbevirolašmáhtu. Vuođđoskuvlla oahpponeavvu Duodjegáldu galgá dál jorgaluvvot ja heivehuvvot lulli- ja julevsámegillii. Dasa lassin lea Sámediggeráđđi maiddái vuoruhan doarjaga fáddávuđot oahpponeavvuide duojis, lullisámegillii gitta joatkkaskuvlla dássái.

– Borramuš ja dearvvašvuohta fágas leat váilon visotgokči oahpponeavvut sámegillii. Dál beasan iluin almmuhit ahte mii leat juolludan doarjaga ohcamii mas lea ulbmil ráhkadit oahpponeavvoráiddu gaskadássái. Ráidu leat buot golmma sámegillii ja das lea sihke deaddiluvvon ja digitála oasit, loahpaha ráđđelahttu Mikkelsen.

Sámediggi oaččui ohcamiid oktiibuot 33,2 miljovnna ruvnno ovddas. Vaikko leat olu ohcamušat bušeahttarámma ektui, de lea sámediggeráđđi duhtavaš go leat sáhttán gokčat eanaš vuoruhuvvon surggiid dán jagi, dadjá Mikkelsen. Sámedikki doaibmaplána oahpponeavvoráhkadeapmái áigodagas 2015-2018 ja leat vuođđun Sámedikki jahkásaš vuoruhemiide.

Oahpponeavvut maidda mii leat juolludan doarjaga galget ráhkaduvvot ođđa oahppoplánaid vuođul mat válbmanit 2019:s. Ja mis lea ulbmil ahte buvttadeaddjit gárvejit daid ođđa oahpponeavvuid bealnjealját jagis.

Jus áiggut jearahallama,de riŋges sámediggeráđđái Mikkel Eskil Mikkelsenii, +47 917 42 161.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!