Sámi mánát ja nuorat galget iežaset gillii oahppat hástaleaddji áššiid birra

Sámediggi vuoruha logi miljovnna ruvnno digitála oahpponeavvuide mat galget eastadit givssideami, gárrenmirkodili, veahkaválddi ja illasteami.

Ođas | Almmuhuvvon

Ohppiidiskkadeami Elevundersøkelsen logut čájehit ahte sámi oahppit vásihit givssideami sin skuvlaárgabeaivvis. Sámi dearvvašvuođadutkama guovddáža dutki Astrid M.A. Eriksen dutkan čájeha ahte sámi nissonolbmot Norggas leat gillán eanet veahkaválddi ja illasteami go nissonolbmot muđui riikkas. Dá leat fáttát maid birra gávdnojit unnán oahpponeavvut sámegillii.

DSC_3633.JPG

Sámediggeráđđi Mikkel Eskil Mikkelsen

Oahppu lea deaŧalaš

– Dát lea duođalaš ja dohkkemeahttun dilli. Mii fertet háhkat oahpponeavvuid maid skuvllat sáhttet atnit eastadan dihte vuortnuheami, gárrenmirkogeavaheami, veahkaválddi ja seksuálalaš rihkkumiid, dadjá sámediggeráđđi Mikkel Eskil Mikkelsen.

Sámi mánát ja nuorat dárbbahit oažžut oahpu ja smiehttat dáid fáttáid ja hástalusaid birra iežaset gillii.

– Mii fertet arvat čalmmustahttit, hupmat ja digaštallat áššiid. Munnje lea hui dehálaš ahte sámi oahpaheaddjit ožžot buriid oahpponeavvuid oahpahussii, dadjá Mikkelsen.

Almmuhan gilvvu

Sámediggeráđđi lea dál almmuhan gilvvu mas ulbmil lea ráhkadit rámmašiehtadusa oahpponeavvoráhkadeddjiiguin, geat sáhttet ráhkadit digitála fágaidrasttideaddji oahpponeavvuid davvi-, julev- ja lullisámegillii vuođđo- ja joatkkaoahpahusa váras mat fátmmastit dáid fáttáid:

  • Rumaš, seksualitehta ja rájiidbidjan
  • Gárrenmirkkogeavaheami, veahkaválddi ja illasteami eastadeapmi
  • Vuortnuheami, loavkideami ja vealaheami eastadeapmi

Gilvu lea almmuhuvvon neahttabáikkis Doffin.no. Áigemearri buktit fálaldaga lea geassemánu 7. beaivvi 2019. Sámediggi sávvá oažžut olu buriid fálaldagaid. 

– Diehtu, máhttu ja ipmárdus addá midjiide doaivaga nagodit rievdadit min servodatdili ja ovdáneami buoret guvlui, dadjá sámediggeráđđi Mikkel Eskil Mikkelsen.

Gulahallandieđut:
Jus leat gažaldagat dahje áiggut jearahallama, de váldde oktavuođa sámediggeráđiin Mikkel Eskil Mikkelseniin, + 47 917 42 161.
Eanet dieđut gilvvu birra leat Doffinas

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!