Sámi Giellagáldus ođđa neahttasiiddut

Davviriikkalaš sámegielaid fága- ja resursaguovddáš Sámi Giellagáldu lea odne váldán adnui ođđa neahttasiidduid. Ođđa neahttasiidduin leat sierra siiddut sihke lulli-, julev-, davvisámegiela ja anáraš- ja nuortalašgiela várás.

Giellagáldu-siidu.jpg
Sámi Giellagáldu neahttasiidu/Nettsida til Sámi Giellagáldu

Ođas: Almmuhuvvon , ođasmahtton

– Ovdamearkan lullisámegiela siidduin gávdná álkit dieđuid lullisámegiela ođđa tearpmaid ja normeremiid, ja lullisámegillii guoski doaimmaid birra. Seamma láhkai doibmet maiddái eará sámegielaid siiddut, muitala Sámi Giellagáldu fágajođiheaddji Mika Saijets.

Dávjá neahttasiidduid sisdoallu jorgaluvvo iešguđetge sámegillii ja seamma sisdoalu sáhttá lohkat máŋgga gillii. Sámi giellagáldu lea ráhkadan ođđa neahttasiidduid guhtege sámegiela geavaheddjiid dárbbuid vuođul. Iešguhtege sámegielas leat sierra dárbbut ja hástalusat.

– Lullisámegielagat ohcet dávjá lullisámegiela ođđa tearpmaid eaige vaikkobe anárašgiela ođđa tearpmaid. Danin mii leat válljen almmuhit guhtege giela várás sierra siidduid dan sadjái go ráhkadit vihtta sullasaš siiddu iešguđetge sámegillii, čilge Saijets.

Ođđa neahttabáikái čohkkejuvvojit dieđut sámegielaide guoski dáhpáhusain, dego sámegielgurssain, seminárain ja konferánssain. Dán láhkai geavaheaddjit gávdnet dieđuid álkit ovtta ja seamma neahttabáikkis.

– Sámi Giellagáldu lágida diehttalasat muhtun veardde dáhpáhusaid, muhto eanaš dáhpáhusaid ordnejit eará lágideaddjit. Boahtte lávki leage gulahallat giellaguovddážiiguin, allaskuvllaiguin, universitehtaiguin ja eará doibmiiguin, mat lágidit ovdamearkka dihte sámegielgurssaid, ja oažžut sis dieđuid. Dán láhkai mii bastit čohkket dieđuid dáid min ođđa siidduide, muitala Saijets.

Neahttačujuhusa www.giella.org bakte giellageavaheaddjit sáhttet sáddet gažaldagaid ja oažžut giellageavaheapmái guoski rávvagiid ja árvalusaid ovdamearkka dihte heivvolaš sániid birra. Artihkkaliin čállojuvvojit iešguđetlágán giellaáššiin, dego giellajuhkosiid mearridan tearpmaid ja normeremiid birra. Sámegielat siidduin leat liŋkkat elektrovnnalaš sátnegirjjiide ja eará sámegiela riektačállima várás ráhkaduvvon ávkkálaš bargoreaidduide.

Dasa lassin neahttasiidduin leat suoma-, ruoŧa- ja dárogielat vuollesiiddut, main leat dieđut sámegielaid ja Sámi Giellagáldu birra.

Lassedieđut: Sámi Giellagáldu Mika Saijets, +47 90 20 11 38

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!