Sámedikki nuoraidpolitihka organiseren

Sámedikki dievasčoahkkin mearridii odne ovttajienalaččat ášši Sámedikki nuoraidpolitihka organiserema birra.

Ođas | Almmuhuvvon

Sámediggi lea guorahallan Sámedikki nuoraidpolitihkalaš organiserema, ja lea buktán molssaeavttuid dasa movt nuoraidpolitihkalaš mielváikkuheapmi sáhttá organiserejuvvot. Sámediggi áigu nannet sámi nuoraid mielváikkuhanvejolašvuođa Sámedikki politihkkii. Go galgá juksat dán mihttomeari, áigu Sámediggi bargat čuovvovačča vuođul:

1. Sámedikki nuoraidpolitihkalaš lávdegoddi (SáNuL) nannejuvvo Sámedikki mielváikkuhanorgánan. SáNuL rolla ja doaimma ráđđeaddi orgánan ja sáhkaguoddin nannejuvvo mii ovddida nuoraid beroštumiid Sámedikki guovdu. Hábmejuvvojit ođđa njuolggadusat/prosedyrat SáNuL  nammadeapmái, man oktavuođas nuoraid mielváikkuheapmi nammadanproseassas nannejuvvo. Buoret dihtomielalašvuohta, čielgaset rutiinnat ja eanet struktuvrralaš čoahkkinorganiseren, čielgaseappo deaivvadansajit ja čoahkkimat SáNuL ja sámediggeráđi gaskka ja SáNuL ja lávdegodde/dievasčoahkkima gaskka. Árvvoštallat maiddái vejolašvuođa ahte sáhtášii go SáNuL čujuhit/sárdnut sámedikki áirasiidda go sii leat čoahkis. Sámediggi áigu láhčit ain eanet deaivvadansajiid SáNuL ja eará sámi nuoraid organisašuvnnaid gaskka, ja dasto geahčadit málliid ja kanálaid movt sin eanet searvvahit ja oažžut sis cealkámušaid.

2. Noereh organisašuvnna nannen Organisašuvdna ja dan bargu nannejuvvo. Vejolašvuođat buoridit oktiiordnema ja ovttasbarggu SáNuL ja Noereh gaskka sáhttá čielggaduvvot, maiddái geahčalit lagabui vejolašvuođa “bargo- ja rollajuogu” ektui orgánaid gaskka. Sihke go guoská sámi nuoraidjitnii stuorraservodaga guovdu, ja ahte SáNuL nu govdadit go lea vejolaš fakkastuvvo organiserejuvvon sámi nuoraidbirrasiidda.

3. Sámi studeantasearvvit Sámediggi lea iluin oaidnán ahte ásahuvvojit sámi studeantasearvvit. Studeantasearvvit váikkuhit nana deaivvadanbáikkiid ásaheami sámi nuoraide, ja leat deaŧalaš arenat nuoraid mielváikkuheapmái. Sámediggi háliida váikkuhit dan ahte studeantasearvvit sáhttet bargat buori vuogi mielde, ja áigut geahčadit makkár vugiiguin doarjut dáid doaimma.

4. Sámedikki bargu eanet nuoraid oččodemiin Sámedikki válgajienastuslohkui ja oažžut sin eanet searvat válggaide. Ferte oktilaččat doaibmabijuid bokte oččodit eanet nuoraid beroštišgoahtit Sámedikkis, buoridan dihtii máhtu, dainna áigumušain ahte eanet nuorat registrerejit iežaset válgajienastuslohkui ja válgii searvan buorránivččii nuoraid gaskkas.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!