Sámediggi addá 1,7 miljon ru. ealáhusprošeavttaide Davvenjárggas ja Skiervvás

Sámediggeráđđi lea maŋimuš čoahkkimis 2018:s addán doarjaga 1,7 miljon ru. ealáhusdoaibmabijuide Davvenjárgga gielddas Finnmárkkus ja Skiervvá suohkanis Romssas. – Dás lea stuorra mearkkašupmi ealáhuseallimii dáin riddogielddain, dadjá sámediggeráđđi Silje Karine Muotka, guhte oaivvilda deaŧalažžan nannet eavttuid mearrasámi kultuvrra várás dáin guovlluin gos dáruiduhttin lea leamaš garas.

Kurt Einarsen AS (Privat foto).jpg

Kurt Einarsen AS Skiervvás oaččui Sámedikkis doarjaga fatnasa ja govdunkáija investeremii (priváhta govva)

Ođas | Almmuhuvvon

Sámediggeráđi maŋimuš čoahkkimis 2018:s juolluduvvui doarjja Kamøyvær riddosearvái Davvenjárgga gielddas 300 000 ru. káijarusttega divvumii ja ođđa ávdnunskajáide nannen dihtii bálvalusfálaldaga nannámis.

krigerfisk 2.jpg

Krigerfisk AS Mads Gerhardsen bokte Davvenjárgga gielddas oažžu sámediggeráđis doarjaga investeret ođđaáigásaš bivdofatnasa oktan reaidduiguin (priváhta govva)

– Káijarusttet ja ávdnunskaját leat doaibmabijut mat bohtet ávkin guovllu guolástusealáhussii, dadjá sámediggeráđđi Muotka, guhte oaivvilda ahte dát lea deaŧalaš infrastruktuvra árjjalaš riddofatnasiidda. 

Čoahkkimis juolluduvvui maiddái 270 000 ru. Krigerfisk AS:ii, Mads Gerhardsen bokte, Davvenjárgga gielddas ođđaáigásaš bivdofatnasiid oktan reaidduiguin investeremii.

– Sámediggi áigu dáinna doarjagiin váikkuhit riddolagaš guolástusealáhusa nannema sihke mearas ja nannámis, ja dakko bokte váikkuha Sámediggi dasa ahte guolásteaddjit geat háliidit álggahit doaimma iežaset fatnasiin vuosttaš gearddi ožžot ruhtadanveahki.

Áigut bisuhit bivdoaktivitehta

Muotka dadjá ahte Sámediggi dahká dán huksen dihtii ja bisuhan dihtii guolástusaktivitehta sámi riddo- ja vuotnaguovlluin, ja mihttomearrin lea háhkat buoret rámmaeavttuid fanasođasmahttimii ja dieinna lágiin nannet ođđarekrutterema guolástusfidnui.

Sámediggi lea 2018:s juolludan doarjaga guolástusealáhussii oktiibuot 6 368 000 ru.

– Dát lea deaŧalaš veahkki. Maŋimuš jagiid lea rekrutteren guolástussii leamaš jeavddalaš ja buorre. Dát čájeha ahte Sámediggi lea šaddan deaŧalaš doarjjaaddin guolástusa ahtanuššamii rittus, dadjá Muotka.

Doarjja maiddái mátkeealáhusaide

Sámediggeráđđi attii doarjaga maiddái muhtun eará ealáhusprošeavttaide maŋimuš ráđđečoahkkimis ovdal juovlaluomu. 

Mátkeealáhusfitnodat Destinasjon 71 grader Nord Davvenjárgga gielddas oaččui 300 000 ru. muorralávuid ceggemii. Fitnodat áŋgiruššá erenoamážit fanasturisttaiguin ja hurtigrute-fatnasa ektui Davvenjárgga gielddas.

Destinasjon 71 grader Nord, Nordkapp.JPG

Mátkeealáhusfitnodat Destinasjon 71 grader Nord Davvenjárgga gielddas oaččui doarjaga muorralávuid ceggemii. 

– Mátkeealáhus lea eará ealáhus mii lea ahtanuššamin, ja dán oktavuođas lea sáhka nana prošeavtta birra mas leat hárjánan eaiggádat geat barget mátkeealáhusdoaimmain mii juo lea ásahuvvon. Sii háliidit viiddidit doaimmaset, ja ledje ráhkadan buori plána dása, deattuha Muotka.

Fitnodat NT Eiendom ANS Skiervvás oaččui 400 000 ru. doarjaga hukset bádjehálla. Fitnodat bargá bajásdoallamiin ja el-rávdnjeinstallašuvnnaiguin guolástus- ja mearrageavahusealáhusas.

Maiddái eará fitnodat Skiervvá suohkanis, Kurt Einarsen AS, oaččui doarjaga sámediggeráđis. Sii ožžo maiddái 400 000 ru. fatnasa ja govdunkáija investeremii. Mátkeealáhusfitnodat áigu áŋgiruššat mearraturismmain ja erenoamážit lágidit fálissafarimátkkiid Skiervvás, maid ohcalit dađistaga eanet.  

– Mun lean movtta go mii sáhttit addit doarjaga ealáhusdoibmii sihke Davvenjárggas ja Skiervvás, dadjá Muotka loahpas.

Jearaldagaide vástida ja addá jearahallama sámediggeráđđi Silje K. Muotka, + 47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!