Sámediggeráđđi lea duhtavaš go guollebiebmanlohpi hilgojuvvo

Guolástusdirektoráhta hilgu Finnmárkku fylkkagieldda mearrádusa váiddaáššis akvakulturlokalitehtain Vebovttus Davvenjárgga gielddas ja ohcan sáddejuvvo ođđa meannudeapmái. – Mun registreren ahte Guolástusdirektoráhta go meannudii váidagiid bidjá deattu dan erenoamáš ovddasvástádussii mii Norgga eiseválddiin lea sámiid guovdu go lea álgoálbmot. Dainna lean mun hui duhtavaš, dadjá sámediggeráđđi Silje Karine Muotka.

Ođas | Almmuhuvvon

Finnmárkku fylkkagielda mearridii borgemánus 2017 addit lobi luossa-, dápmot- ja girjeluossabiebmamii Vebovttus Davvenjárgga gielddas. Lobi váide Sámediggi, Heidi Persen ja Ingunn Utsi. Sámedikki váidaga duogážin lei dat go fylkkagieldda mearrádus ii doarvái deattuhan ahte guovlu lea mearrasámi kultuvrra luondduvuođus, erenoamážit kulturmuittuid ektui nannámis, ja mearra lea deaŧalaš guolleresursa mearrasámi eallinvuohkái.

Guolástusdirektoráhta čujuha váiddameannudeamis akvakulturlága ovdabargguide. Lágas deattuhuvvo ahte akvakultuvrra lokaliserema oktavuođas galgá guolástusa sáhttit erenoamážit suodjalit, erenoamážit go rusttegat áitet árbevirolaš bivdosajiid. Guolástusdirektoráhta oaivvilda ahte Finnmárkku fylkkagielda ii leat áššemeannudeamis vuhtii váldán dan erenoamáš suoji mii sámiin lea álbmotrievtti mielde. Dát, oktan váilevaš birrasa vuhtii váldima árvvoštallamiin, dagaha ahte Guolástusdirektoráhta ii ane fylkkagieldda mearrádusa lobálažžan.

Sámediggeráđđi lea registreren dan viiddis áŋgiruššama ja báikkálaš vuostehágu akvakultuvrra vuostá maid sámi biras Vebovttus lea čájehan.

– Mun oainnán movt báikkálaš sámi biras áŋgiruššá Stranda báikkis, gižžudettiinis árbevirolaš bivdosajiid ja resursaguovlluid ovddas. Guolástusdirektoráhta mearrádus addá munnje jáhku ahte báikkálaš áŋgiruššan oainnusmahttá mearrasámi vuoigatvuođaid servodagas eanet go ovdal lea dahkan. Ohcan sáddejuvvo Rogalándda fylkkagildii ođđa meannudeapmái ja Sámediggi áigu čuovvulit ášši viidáseappot, dadjá Muotka.

Gažaldagaide vástida ja addá jearahallama sámediggeráđđi Silje Karine Muotka, mob. +47 984 87 576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!