Rabas joavkkus 2019:s ii leat birgenvejolaš bivdoearri

Guolástusministtar Harald T. Nesvik attii juovlamánu 21. b. rabas jovkui surgadis juovladieđu ahte eai sáhte guolástit birgehahtti lági mielde boahtte jagi. – Mun lean hui sakka behtohallan go guolástusministtar dál ii sihkkaraste eavttuid mat bohtet ovdan oasseváldilága ovdabargguin, mas eaktuduvvo ahte mearrasámi guolásteddjiin galgá leat vuoigatvuohta guolástussii mainna sáhttá birget, dadjá sámediggeráđđi Muotka.

Ođas: Almmuhuvvon

– Stáhtaráđđi bisseha hui dárbbašlaš ja hui buori ahtanuššama rabas joavkkus go bidjá dorskebivdoeriid nu vulos 2019:s ahte ollu smávit guolásteaddjit rabas joavkkus gártet rahčat hui ollu. Dát áitá sakka mearrasámi kultuvrra, ja stáhtas lea eahpitkeahttá ovddasvástádus mearrasámi kultuvrra sihkkarastimis boahtteáiggis, maid maiddái Olmmošvuoigatvuođaid nationála ásahus cuiggoda go guoská mearrasámi guolástusaide, dadjá Muotka.

Dohkketmeahttun

Muotka oaivvilda ahte Sámediggi dieđusge háliida maiddái dakkár hálddašeami mas boahtteáiggi resursavuođđu suodjaluvvo, eaige guolleresurssat goariduvvo. Hástalussan lea ahte olles guolástushálddašeapmi láhčá ávkin stuorát fatnasiidda.

– Mii oaivvildat ahte stuorát fatnasat dat fertejit unnidit bivddu, ja ahte trolaráidalasa ferte rievdadit nu ahte mis sáhttet leat árjjalaš riddofatnasat, dadjá Muotka.

– Dan botta galget nappo guolásteaddjit rabas joavkkus, mat bisuhit rittu eallimin almmá vejolašvuođa haga sáhttit birget sin bivdduin. Dát lea dohkketmeahttun, dadjá Muotka.

Reageret aktivitehtagáibádussii

Muotka oaivvilda ahte go lea nu garra preassa dorskeresursii, berrešii bivdoearrešiehtadusaid eará riikkaiguin árvvoštallat nu ahte geahpedit dorskebivdoeari vai galgá leat vejolašvuohta bisuhit árjjalaš, beaktilis ja servodatnannejeaddji riddofatnasiid boahtteáiggis. Son reagere maiddái garrasit dasa go ministtar duppalastá aktivitehtagáibádusa reabbábivddus 100 000 ruvnnus 200 000 ruvdnui dál.

– Dát gáibádus eahpitkeahttá ain eanet lasiha deattu dorskeresursii ja riddodorskái. Vaikko sáhtášii deavdit aktivitehtagáibádusa eará vilges guliiguin, de leat eiseválddit barggusteaset mearrasámi kultuvrra bisuheamis bidjan hui stuorra fokusa dorskebivdui sihke riddobivdoeriid várrema bokte ja dáid aktivitehtagáibádusaiguin oažžut reabbábivdoeari.

Sámedikkiin eai leat konsulteren

Muotka konstatere ja mii lea maiddái šállošahtti go stáhtaráđđi ii leat konsulteren Sámedikkiin go guoská bivdoearrereguleremii konsultašuvdnašiehtadusa mielde.

– Mii leat juovlamánus čađahan čoahkkima masa mu mielas ledje funet ráhkkanan, gos ii movtge geahččaluvvon gávdnat čovdosiid bivdoearreáššái rabas joavkkus ja riddobivdoearis ministara beales, dadjá Muotka. Čoahkkin ii lean konsultašuvdna, go departemeantta beales eai dahkan makkárge árvvoštallamiid mearrasámi kultuvrra ovddasvástádusas, eaige movtge geahččalan gávdnat čovdosiid.

– Sámediggi fertii ovdan bidjat min evttohusa ovdagihtii, ja mun geahččalin čoahkkimis konkretiseret eanet čovdosiid, muhto ferten dušše konstateret ahte guolástusministtar orui válljemin eret buot evttohusaid maid Sámediggi buvttii. Dat mii dáhpáhuvai ii leat konsultašuvdna mii šiehtadusa mielde “galgá dáhpáhuvvot buriin jáhkuin ja dainna ulbmilin ahte soahpat evttohuvvon doaibmabijuin”, dadjá Muotka.

Gažaldagaide vástida ja addá jearahallama sámediggeráđđi Silje K. Muotka, mob. +47 984 87 576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!