PRM: Sámedikki váidda Nussira mearrádusas lea sáddejuvvon ráđđehussii

Sámediggi oaivvilda ahte mearrádus Ealáhus- ja guolástusdepartemeanttas rihkku máŋggaid riikkaidgaskasaš ja nationála lágaid ja konvenšuvnnaid.

Ođas | Almmuhuvvon

Sámediggi váidá Ealáhus- ja guolástusdepartemeantta guovvamánu 14. b. 2019 beaiváduvvon mearrádusa, go lea juolludan doaibmakonsešuvnna Nussir ASA:i ruvkedoibmii Nussiris ja Gumpenjunis Fálesnuori gielddas.

– Dát lea okta dain stuorámus duohtademiin min eana- ja riddoguovlluin ođđaset áiggis, mas leat suorggahahtti stuorra biras- ja servodatlaš váikkuhusat. Ráđđehus galgá diehtit ahte mii áiggo vuollánit almmá dáistaleami haga, dadjá sámediggeráđđi Silje Karine Muotka.

Logi siidosaš váidda lea sáddejuvvon departementii ja dan sáhttá lohkat dás (dárogillii):

Sámediggi čujuha váidagis golbma váldoákkaide:

  • Departemeanta ii leat mearrádusastis bidjan mearkkašahtti deattu boazodoalu, sámi kultuvrra, ealáhusbarggu ja servodateallima vuhtii váldimii, nugo Minerálalágas geatnegahttojuvvo. Sámediggi oaivvilda ahte ruvkedoaibma rihkku vejolašvuođa doaimmahit sámi kultuvrra guovllus.
  • Departemeantta ii leat čielggadan leago ruvkedoaibma servodatekonomalaččat gánnáhahtti, iige departemeanta leat árvvoštallan leago mearrádus servodatekonomalaččat dohkálaš. Departemeanta maid ii leat bidjat vuođđun Luondduvalljodatlága ovdagihtii várrugas prinsihpa.
  • Departemeanta addá doaibmakonsešuvnna searvái mas njealjadas oassi eaiggádiin hálddašanregisttaris leat čihkosis, ja maid departemeanta, Sámediggi, vuoigatvuođaoamasteaddjit eaige álbmot muđui ge dieđe geat dat leat. Stuorradiggi lea hui kritihkalaš servviide main lea čiegus eaiggátvuohta.

– Suorggahahtti allamielalaččat

Dasa lassin oppalaš váilivuođaide čielggadusain birrasa ja guolástusa birra, čujuha Sámediggi maiddái dasa ahte eai leat leamaš duohta konsultašuvnnat eiseválddiid ja guovllu boazodolliid gaskka. Departemeanta ii leat vuhtii váldán sámi beroštumiid, luonddu- ja birasgáhttenorganisašuvnnaid iige stáhta iežaset fágaorgánaid, mat leat dorjon Sámedikki fuolastumiid.

– Departemeanta lea suorggahahtti allamielalaš go duolbmá vuoigatvuođaoamasteddjiid go lea nu mielas riggudahttit veaháš muhtun eaiggádiid ja ruvkeinvestevrraid, maid eat oppa dieđege geat sii leat. Sámi bearrašiin rivvejuvvo birgejupmi ja riska lea ahte Riehpovuotna billistuvvo. Dát lea speallu man ovddas mii ferte máksit. Dan eat sáhte mii dohkkehit, dadjá Muotka.

Vuoruhuvvon ášši Sámediggái

Váidda manná dál meannudeapmái Gonagassii stáhtaráđis.

Sámediggi lea guovtti dievasčoahkkináššis stuorra eanetloguin čielgasit vuostálastán ruvkeprošeavtta Nussiris ja danne lea leamaš vuoruhuvvon ášši Sámedikkis, muitala sámediggepresideanta.

– Sámi servodat ferte leat gearggus dasa ahte Nussir ášši vejolaččat geahččaluvvo norgga duopmostuoluin prinsihpalaš sivaid geažil, loahpaha sámediggepresideanta Aili Keskitalo.

Eanet dieđuid ja jearahallama ášši birra addiba:
Sámedikki presideanta Aili Keskitalo: tel. 971 29 305
Sámediggeráđđi Silje Karine Muotka, tel. 984 87 576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!