PRM: Sámediggi lea ovttasbargguin Dearvvašvuođadirektoráhtain ja Pasieantaáittardeaddjin ožžon sadjái sámi pasieanta- ja geavaheaddjiáittardeaddji

Dearvvašvuođadirektoráhta lea ovttasbargguin Sámedikkiin ja pasieanta- ja geavaheaddjiáittardeddjiin mearridan nannet áittardeaddjeortnega sámi pasieanttaid várás. Pilohtaprošeakta mii bistá 2 jagi galgá dál álggahuvvot. – Deaŧalaš lávki sámi pasieanttaide ja geavaheddjiide, dadjá sámediggeráđđi Mikkel Eskil Mikkelsen.

Ođas | Almmuhuvvon

Lea mearriduvvon ahte Pasieanta- ja geavaheaddjiáittardeddjii galgá álggahit geahččalanprošeavtta, man oktavuođas ráđđeaddis geas lea gelbbolašvuohta sámi gielas ja kultuvrras galgá leat erenoamáš ovddasvástádus sámi pasieanttaid dárbbuin, beroštumiin ja vuoigatvuođain riikkas.

IMG_E3509.JPG

Sámediggeráđđi Mikkel Eskil Mikkelsen

FOTO | Åse M.P. Pulk/Sámediggi

– Deaŧalaš lea ahte sámi pasieanttat ja geavaheaddjit dál ožžot iežaset áittardeaddji. Leat erenoamáš hástalusat leahkit sámi pasieanta ja geavaheaddji, sihke gielddaid dearvvašvuođabálvalusain ja spesialistadearvvašvuođabálvalusain, danne lea deaŧalaš ahte dáid hástalusaide dál biddjojuvvo fuomášupmi, čujuha Mikkelsen.

Pasieanta- ja geavaheaddjiáittardeaddji riikkas oažžu dán doaibmabiju bokte sierra ráđđeaddi geas lea sámi giella- ja kulturgelbbolašvuohta. Dat nanne gelbbolašvuođa olles áittardeaddjiortnegis, ja dasto duste sin vuoigatvuođaid ovttaárvosaš bálvalusaid ektui maiddái min ortnegis.

– Deaŧalaš lea geahččat olles riikka oktan. Sámi pasieanttat ja geavaheaddjit ásset miehtá Norgga, danne lea riekta ahte mii eat divtte dáláš rájáid áittardeddjiid gaskka Norggas hehttet dan ahte áittardeaddjis lea buorre máhtolašvuohta sámi gielas ja kultuvrras, dadjá Mikkelsen.

Prošeakta lea geahččalanprošeakta mii galgá bistit guokte jagi.

– Dat lea buorre álgu dán lágan áittardeaddjái. Pilohtaprošeavtta vásihusat leat deaŧalaččat go jurddašit sihke saji ja resurssaid. Dasa lassin lea deaŧalaš ahte pasieanttat ja geavaheaddjit bohtet diehtit áittardeaddji birra. Mii diehtit ahte sámi álbmot unnán geavaha sierra áittardeaddjiortnegiid mat leat Norggas, dieinna lágiin fertet mii oaidnit mainna lágiin pilohtaprošeakta nagoda juksat sámi pasieanttaid ja geavaheddjiid, dadjá sámediggeráđđi Mikkel Eskil Mikkelsen.

Gažaldagaid vástida ja jearahallama addá sámediggeráđđi Mikkel Eskil Mikkelsen, tel. +47 917 42 161 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!