PRM: Doarjja sámegiela ja sámi spealuid ovddideapmái

Sámediggeráđđi addá doarjaga guovtti fitnodahkii giellakurssaid čađaheapmái rávis olbmuide, ja juolluda speallo-applikašuvnnaid ovddideapmái mánáid várás. – Deaŧalaš lea ahte Sámediggi doarju sámi giellafálaldaga buot ahkejoavkkuide iešguđege vugiiguin, dadjá sámediggeráđđi Mikkel Eskil Mikkelsen (NSR)

Ođas | Almmuhuvvon

Miksapix interaktive lea oktiibuot ožžon 600 000 ru guovtti ođđa speallo-applikašuvvnii. Dát leat vuosttaš spealu čuovvut mii almmuhuvvui 2019: ja man namma lea «Raanaa – Sjamanjenta». Miksapix čállá ahte dat lea bures vuostái váldojuvvon, ja sii leat ožžon máhcahusdieđuid ahte publikumma háliida eanet spealuid dán spealloráiddus. Danne leat sii joatkán dáinna speallokonseaptain i 3D:s.

Boahttevaš almmuhusat leat spealut guokte ja golbma dán ráiddus, ja daid namat leat «En verden i frost» ja «Bárbmoáhkka og trekkfuglene»

- Giellaprošeavttain 2020 vuoruhuvvojit ruđat giellaapplikašuvnnaide ja spealuide mánáid ja nuoraid várás sámegillii. Min mielas lea deaŧalaš addit sámi mánáide ja nuoraide máŋggalágan digitála fálaldaga. Dát lea gelddolaš fitnodat maid mun háliidan galledit go de heive, dadjá Mikkel Eskil Mikkelsen.

Doarjja dávista Giellaloktemii, Sámedikki strategiijaide sámegielaid várás, maid gaskkas okta strategiijain lea ásahit eanet sámi spealuid, applikašuvnnaid ja youtube-kanálaid. Vuosttaš áŋgiruššansuorggis; giellafálaldagat mánáide ja nuoraide, čuožžu: «Dárbbašuvvo máŋggabeallálaš ja buorre sisdoallu seamma láhkai go fálaldagas dárogielagiidda, ja ferte fuolahuvvot ahte dat lea olámuttus geavaheddjiide. Spillat, applikašuvnnat, YouTube ja sullasaččat mat leat heivehuvvon mobiillaide ja dihtoriidda, sáhttet ávdnet buriid digitála deaivvadansajiid gos gulahallan sáhttá dáhpáhuvvat sámegillii.»

Sámegiella rávis olbmuide                                                                                     

ABC-Company E-skuvla lea ožžon 174 000 ru Sámedikkis giellakurssa čađaheapmái rávis olbmuide. Doarjjaortnega mihttomearrin sámi giellaprošeavttaide lea ahte álbmogis lea vejolašvuohta oahppat sámegiela ja ovdánahttit giela.

- Dát lea joatkkakurssa sidjiide geat juo máhttet veaháš sámegiela, dahje sidjiide geat ovdal leat váldán ABC-Company kurssa. Deaŧalaš lea ahte sii geat leat čađahan kurssa ovdal besset čiekŋudit gielas ja oahppat eanet, amas giellaovdáneapmi bisánit. Kursa veahkeha sin šaddat sámi giellageavaheaddjin, dadjá Mikkel Eskil Mikkelsen.

Sámedikki 2020 bušeahtas Giellaprošeavttaide leat vuoruhuvvon ruđat kurssaide sámegielas rávis olbmuide. Čujuhit maiddái giellaloktemii gos čuožžu ahte «Sámegielain lea stuorra mearkkašupmi ovttaskas giellageavaheaddjái, sámi álbmogii ja sámi servodaga ovddideapmái. Sámegielain ii leat dušše sáhka gulahallamis, muhto dain lea lagas čatnaseapmi sámi identitehtii, kulturárbái ja gullevašvuhtii».

Jearahallama addá sámediggeráđđi Mikkel Eskil Mikkelsen, tel. +47 917 42 161. Govaid Mikkelsenas gávnnat dás, ja daid oažžu friddja geavahit go kreditere govvejeaddji: https://www.flickr.com/photos/samediggi/albums/72157687389005730

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!