PRD: Vuosttaš sámi boazodoalloláhkalávdegoddi lea nammaduvvon

– Mii leat ilus dál go vuosttaš gearddi lea nammaduvvon sámi láhkalávdegoddi, lohkaba sámediggepresideanta Aili Keskitalo ja NBR jođiheaddji Ellinor Marita Jåma. Sámediggi ja Norgga Boazosápmelaččaid Riikasearvi (NBR) leat nammadan láhkalávdegotti mii galgá geahčadit boazodoallolága.

Ođas: Almmuhuvvon , ođasmahtton

Reindrift-C-Aina-Bye_mainimage.jpg
Foto: Aina Bye/Sametinget

Sámediggi ja NBR leat ovttaoaivilis lávdegotti mandáhtain, lohká sámediggepresideanta Aili Keskitalo.

– Lávdegoddi galgá geahčadit siskkáldas áššiid boazodoalus, ja sáhttá evttohit lassi rievdademiid mat sihkkarastet proseassaid mat leat čatnašuvvon ja mat leat dohkkehuvvon boazodoalus. Lávdegoddi galgá maid geahčadit erohusa gaskkal priváhtarievttalaš stivrema ja almmolašrievttalaš hálddašeami, ja maid árvvoštallat siidaosiid ámmáha. Lávdegoddi galgá evttohit rievdademiid mat nannejit areálasuddjema boazodoalus, ja geahčadit láhkamearrádusaid mat gusket boazolohkui.

– Lea dehálaš geahččat lága obbalaččat ja váldit vuhtii ealáhusa vásáhusaid boazodoallolágain mii ii doala álbmotrievttalaš dási. Buorre livččii jus oažžut áibbas konkrehta ávžžuhusaid dasa movt láhka galggašii rievdaduvvot, go dat dagahivččii álkibun bargat Stuoradikki vuostá dárbbašlaš láhkarievdadanproseassaiguin, lohká NBR jođiheaddji Ellinor Marita Jåma.

Sámediggeráđđi Silje Karine Muotka namuha ahte lea váidalahtti go Eanadoallo- ja biebmodepartemeantta áigumuš láhkaproseassain lea ahte rievdadit boazodoallolága muhtin muddui bihtáid mielde, paragráfa paragráfa maŋis.

– Sámediggi lea bovden guovddáš eiseválddiid nammadit láhkalávdegotti, muhto EBD jotkkii sávvat ahte rievdadit lága osiid mielde. Danin leat mii dál nammadan vuosttaš sámi láhkalávdegotti, lohká Muotka, gean mielas lea riekta ahte lea juste boazodoallosuorggis. Boazodoallu lea čielga álgoálbmotealáhus, ja sámi perspektiivvat ja oaivilat fertejit vuhtiiváldojuvvot  jus galgá sáhttit sihkkarastit doarjaga sámi álbmogis ja boazodoalus.

Lávdegottis mii galgá geahčadit olles boazodoallolága, leat dát olbmot mielde:

Ragnhild Marit Sara – lávdegotti jođiheaddji, jurista
Kirsti Strøm Bull, professor, dr.juris
Samuel John N. Anti, boazodoalli
Nils Per Jåma, boazodoalli
Ellen Inga Turi, dutkan- ja oahppodirektevra, dr.philos
Nils Mikkelsen Utsi, advokáhtta, sámediggeáirras ja boazodoalli
Anna Ravna Gaup, boazodoalli
Mattias Åhren, professor, dr. juris
Ellen Sara Sparrok, boazodoalli

– Mii leat maid hui ilus go mis lea čeahpes sámi nissonjurista; Ragnhild Marit Sara gii jođiha lávdegotti, lohkaba sámediggepresideanta Aili Keskitalo ja NBR jođiheaddji Ellinor Marita Jåma.

Skábmamánu 29. beaivvi áigu Sámediggi bovdet fágaseminárii Áltái, mas geahčadit iešguđetge lágan váttisvuođaid nu go iešmearrideapmi ja hástalusat mat mis dál leat boazodoallolága dihte.

– Mii buktit bovdehusa seminárii maŋŋil, muhto doppe doallá lávdegotti jođiheaddji oanehis álggahusa. Dát šaddá hui viiddis bargu, muhto jus boazodoalu beroštumit galget boahtteáiggi láhkarievdademiin, de fertet mii čađahit dán proseassa., loahpaha Muotka, gii muitala ahte Sámediggi doaibmá čállingoddin dán lávdegottis mii galgá doaibmat eanemusat guokte jagi.

Jus dus leat gažaldagat dahje áiggut jearahallama, de váldde oktavuođa:

* Sámediggepresideanta Aili Keskitalo, +47 971 29 305
* NBR jođiheaddji Ellinor Marita Jåma, +47 916 13 460
* Sámediggeráđđi Silje Karine Muotka, +47 984 87 576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!