PRD: Sámi kulturártnat máhccet ruoktot

Badjelaš 1600 sámi kulturhistorjjálaš dávvirat máhcahuvvojit dál sámi museaide. Gaskavahku geassemánu 19. beaivvi ledje Bååstede-prošeavtta oasálaččat čoahkkanan allaárvosaš čalmmustahttimii Guovdageidnui.

Bååstede avtalen signeres.JPG

 

 

 

Ođas | Almmuhuvvon

19.6 vuolláičálle oasálaččat Sámediggi, Norgga Álbmotmusea, Kulturhistorjjálaš musea ja guđa ovttastuvvon Norgga sámi museaid ovddasteaddji šiehtadusa sirdit sámi dávvirávdnasiid Norgga álbmotmuseas ja Kulturhistorjjálaš museas. Čalmmustahttin lei RDM – Guovdageainnu gilišiljus.

– Sámi servodat ferte hálddašit sámi kulturárbbi, ja odne mii leat álggahan dan historjjálaš proseassa. Mun lean hui ilus ja rámis dainna, dadjá sámediggepresideanta Aili Keskitalo.  

Vuoigatvuohta iežas historjái

Bååstede-prošeavtta vuođđuduvvá vuoigatvuođas ieš hálddašit ja gaskkustit iežas historjjá ja kulturárbbi. Lea maid leamaš dehálaš ovttastahttit sámi dávviriid daid álgovuolggalaš giella- ja kulturbirrasis, danne go dain lea dehálaš diehtu sámi álbmogii duoji, árbevieruid ja giela birra.

Norgga Álbmotmusea ja Kulturhistorjjálaš musea dadjet ahte Bååstede lea leamaš hui dehálaš sidjiide, go dovdo riekta addit sámi kulturárbbi ruovttoluotta Sápmái. Lassin dat rahpá uvssaid mávssolaš ovttasbargui.  

–  Mii sávvat sámi museaid áidnalunddot gelbbolašvuohta ja máhttu maiddái sáhttá boahttevaš ovttasbarggu bokte boahtit Norgga Álbmotmuseai ja Kulturhistorjjálaš museai buorrin. Dat livččii nanusmahttán buot oasálaččaid, dadjá Norgga Álbmotmusea ossodatdirektevrá Inger Jensen.

Sihkkarastá guhkilmas suodjaleami

Eanas oassi 1639 dávvira čoakkáldagas eaiggáda dál Kulturhistorjjálaš musea. Sii leat oadjebasat dasa ahte máhcahančoavddus lea buorre ja riekta.   

– Norgga Álbmotmusea ja Kulturhistorjjálaš musea hálddašit Norgga kulturárbbi buohkaid ovddas. Dál sámi museat váldet badjelasat sámi čoakkáldagaid hálddašanovddasvástádusa. Dávvirat bohtet illudahttit sámi servodaga ja dat sihkkarastojuvvot guhkilmas suodjaleami Sámedikki čuovvuleami bokte, dadjá Kulturhistorjjálaš musea museadirektevra Håkon Glørstad. 

Norgga Álbmotmuseas ja Kulturhistorjjálaš museas galgá ain leat sámi kulturhistorjjálaš dávvirčoakkáldat mii gaskkustuvvo sihke sápmelaččaide, dáččaide ja olgoriikkalaš gussiide.  

Ain nanu áŋgiruššan

Šiehtadus vuolláičállojvvui beaivvát ala čieža jagi maŋŋel go ovttasbargošiehtadus vuolláičállui. Bååstede-šiehtadusa vuolláičállin, mii mearkkaša ruoktot lullisámegillii, lea vuosttaš oassi prošeavttas. Sámediggeráđđi Henrik Olsen lea movttat máhcahanšiehtadusain. Sámediggi áigu dál čuovvulit prošeavtta viidásit.

– Sámi museain lea buorre fágagelbbolašvuohta dán suorggis. Mii dárbbašit nannosit buoridit magasiinnaid ja čájáhusfasilitehtaid, ja lassin nannet museaid fágabargiid geat galget gieđahallat dávviriid. Dat ferte leat sajis ovdal go min kulturhistorjjálaš ártnat sáhttet máhccat ruoktot, loahpaha sámediggeráđđi Henrik Olsen.    

Bååstede-prošeavtta birra:
  • Bååstede-prošeavtta jurdda ilmmai 2007:s Anáris Suomas, prošeavtta Recalling Ancestral Voices loahpahansemináras.
  • Bargojoavku mas ledje ovddasteaddjit Norgga Álbmotmuseas, Sámedikkis ja Sámi Museasearvvis árvvoštalle iešguđetlágan máhcahanmodeallaid.
  • Bargojoavkku raporta ovddiduvvui 2012:s. Geassemánu 19.b. 2012 vuolláičálli Kulturhistorjjálaš musea, Norgga Álbmotmusea ja Sámedikki máhcahanšiehtadusa.
  • Geassemánu 19. b. 2019 vuolláičálle oasálaččat Sámediggi, Norgga Álbmotmusea, Kulturhistorjjálaš musea ja Norgga guđa ovttastuvvon sámi museaid ovddasteaddjit sámi dávvirávdnasiid sirdinšiehtadusa.

Govaid dilálašvuođas gávnnat Sámedikki Flickr-siiddus: https://www.flickr.com/photos/samediggi/albums/72157709154018166

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!