PRD: Sámediggi doarju nuorra guolásteaddji ásahanmuttus

Sámediggi addá 300.000 ru doarjjan Meron AS fitnodahkii Deanu gielddas. Ruđat galget geavahuvvot fatnasa oastimii nuorra guolásteaddjái.

Ođas | Almmuhuvvon , ođasmahtton

Meron AS lea ođđa guolástusfitnodat maid Ari Solbakk lea vuođđudan, ja oažžu 300.000 ru doarjaga bivdofatnasa oastimii. Fitnodat lea gieskat registrerejuvvon ja fatnasa oastin lea vuosttaš gearddi investeren. Fitnodat oaivvilda ahte mearraborramuša jearaldat lassána, ja sin doaibma lea eanaš riddobivdu.Ari Solbakk lea 25 jagi boaris ja áigu bargat konvenšunealla bivdduin Gobis Deanu gielddas. Son oaivvilda ahte fitnodat lea unni, muhto gánnáhahtti guolástusfitnodat.Sámediggeráđđi Silje Karine Muotka (NSR) oaivvilda ahte lea buorre go Sámediggi sáhttá doarjut nuorra rávisolbmuid geat áigo áŋgiruššat stuorrát.

– Illudahttá sakka go rekrutteren guolástusaide lassána, ja erenoamážit illudahttá dat go nuorra olbmot áigo bargat guolástusain. Deaŧalaš lea ahte Sámediggi doarju sin geat háliidit bargat guolástusealáhusas. Dán lágan áŋgiruššan sáhttá addit maiddái eará oalgeváikkuhusaid nugo ovdamearkka dihtii leat mielde sihkkarastimin sámi ássama rittuin, dadjá Muotka.

Jahkásaš bušeahtaid bokte lea Sámediggi várren váikkuhangaskaomiid mariidnaealáhusaide. Doarjaga addima bokte fatnasiidda, báikkálaš vuostáiváldinrusttegiid ođasmahttimiin ja mariidna ealáhusdoaimma buvttaovddideapmái váikkuheami bokte, sáhttit nannoseappot váikkuhit ceavzilis guolástusbirrasiid bisuheami ja nannema sámi riddo- ja vuotnaguovlluin.

Sámediggi áigu eanet áŋgiruššat vuođđoealáhusaiguin dán jagi, ja lea lokten stuorámus doarjaga geavahuvvon fatnasiidda 200.000 ruvnnus 2019:s 300.000 ruvdnui 2020:s.Doarjja lea addojuvvon ortnegis Doarjja vuođđoealáhusaide.

Gažaldagaide vástida dahje addá jearahallama sámediggeráđđi Silje Karine Muotka, mob. +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!