PRD: Sámediggi doarju Sámiráđi miljonbeale ruvnnuin gálvomearkavuoruheami várás.

Sámediggeráđđi lea juolludan 500 000 ru Sámi Duodji ja Sámi Made gálvomearkkaid bargui. Sámi Duodji gálvomerkii gullá sápmelaččaid dahkan árbevirolaš duodji, ja ođđa gálvomearka Sámi Made fas gullá buktagiidda maid sápmelaččat buvttadit, ovdamearkka dihte design.

Ođas | Almmuhuvvon

2014:s Sámiráđđi evaluerii Sámi Duodji gálvomearkka ovttas sámi duodjeorganisašuvnnaiguin. Norgga ja Suoma sámedikkit dorjo evaluerema ekonomalaččat. Evaluerenraporta čájehii ahte lea ain dárbu Sámi Duodji- gálvomerkii. Sivvan dasa lea ahte ealáhus dárbbaša rievttálaš suddjema ja ealáhusovddideaddji doarjaga.

- Lea dehálaš suddjet ja nannet duoji ja sámi designa. Dán oktavuođas galgá Sámiráđđi čađahit rájiidrasttideaddji gálvomearkavuoruheami mas sáhttet leat buorit váikkuhusat miehtá Sámi. Prošeakta sáhttá mielddisbuktit ođđa bálvalusaid ovddideapmái ja rahpat stuorát márkana. Sámediggi háliida searvat dán vuoruheapmái ja ođđa bálvalusaid doarjumii, dadjá sámediggeráđđi Hans Ole Eira (Gb).

Odne ii leat sámi kulturárbi suodjaluvvon doarvái bures. Raporta konkludere maiddái ahte gálvomearkka otná organiseren ii doaimma bures, dasa gullet maiddái eavttut, márkanfievrrideapmi ja lisensieren. Evaluerenraporta ávžžuhii ođastit Sámi Duodji gálvomearkka eavttuid. Sámiráđđi lea ulbmillaččat čuovvulan evaluerenraportta ávžžuhusaid, ja áigu dál ráhkkanahttit Sámi Duodji-mearkka doibmiibidjama.

Raporta ávžžuhii maiddái ásahit ođđa gálvomearkka, Sámi Made, oaivvilduvvon buktagiidda maid sápmelaččat ráhkadit, ovdamearkka dihte design. Gálvomearka Sámi Made sáhttá dađistaga čadnot eanet ealáhussurggiide, nugo musihkkii/luohtái, vásáhusaide, bibmui, girjjálašvuhtii, filbmii, dáidagii jna. Lea dárbu sajáiduhttit Sámi Made mearkka eavttuid Sámis, earenoamážit design-suorggi siskkobealde. Ovttas ođđaásahuvvon kulturealáhusgihpuin (Árvu, Sámi Stories, Arctic lavvu, Graveniid) ráhkkana Norgga Sámediggi seminárii gálvomearkka birra.

- Sámi Duodji lea juo ásahuvvon, ja de lea hui dehálaš ahte Sámi Made boahtá sierra gálvomearkan. Dainna lágiin mii sáhttit várjalit sámi buktagiid vel buoret. Mii sáhttit olahit eanet olbmuid min buktagiiguin, ja mii sáhttit oaidnit gos buktagat bohtet, dadjá sámediggeráđđi Silje Karine Muotka (NSR).

Doarjja juolluduvvo Duoji ealáhusšiehtadusa bokte – ovdánahttin-ja investerendoarjagat.

Sámediggeráđđi Silje Karine Muotka addá jearahallama ja vástida gažaldagaide, mob. +47 984 87 576, silje.karine.muotka@samediggi.no. Sus gávdná govaid dáppe: https://www.flickr.com/photos/samediggi/albums/72157687389005730

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!