PRD: Sámediggi addá doarjaga sáltečáhcerusttegii Unjárggas

Sámediggi lea addán 400 000 ruvnno doarjjan ođđa sáltečáhcerusttegii Kløvnes hámmanis Unjárggas.

Ođas | Almmuhuvvon

Rusttet galgá geavahuvvot gonagasreappáid seailluheapmái mat leat boahtán oalgesálašin báikkálaš rundierpmisbivddus. Rusttegis bisuhuvvojit gonagasreappát eallin dassážii go dat leat doarvái ollu ahte daid sáhttá sáddet viidáseappot njuovvamii ja reidemii.

– Dáinna doaibmabijuin sihkkarastit riddobivdiid gánnáhahttivuođa buorideami Unjárggas. Go sáhttá ávkkástallat rundierbmáin oalgesálašin, de ožžot guollebivdit stuorát árvoháhkama. Dát lea mielde sihkkarastimin bargosajiid ja mii doaivut maiddái ahte dát buoridivččii rekrutterema ámmáhii Unjárggas, dadjá sámediggeráđđi Silje Karine Muotka (NSR).

Lea Unjárgga gielda mii lea ohcci ja mii čađaha doaibmabiju. Rusttet lea fálaldahkan báikkálaš bivdiide geat geavahit guollevuostáiváldima Kløvnes hámmanis.

– Láhčči doaibmabidju mii váikkuha buoret árvoháhkama mariidna varasávdnasiin lea okta min áŋgiruššansurggiin, erenoamážit jos dat váikkuhit guollevuostáiváldima nannemii sámi guovlluin. Danne leat mii movtta Unjárgga gieldda álgaga geažil ja sávvat áinnas doarjut eanet dákkár doaibmabijuid áiggis ovddas guvlui, dadjá Muotka.

Sámediggi lea ollu jagiid badjel dorjon huksemiid Kløvnes hámmanis, ja doaibmabijuin lea leamaš beaktu ja leat buktán positiiva ovdáneami guolástusas Unjárggas.

Unjárgga gielda ozai 500.000 ru doarjaga. Árat dán jagis oaččui Unjárgga gielda 100 000 ru doarjjan galmmihanrádjui Kløvnes hámmanis. Ovttaskas ohcci ii oaččo eanet go 500 000 ru ohcanvuđot doarjaga jahkái, ja danne juolluda Sámediggi 400 000 ru prošektii. Doarjja addojuvvo doarjjaortnegis Doarjja vuođđoealáhusaide, mariidnaealáhusat.

Gažaldagaide vástida ja jearahallama addá sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!