PRD: Sámediggeráđđi doarju guokte dearvvašvuođaprošeavtta

Lullisámi dearvvašvuođafierpmádat Åarjelsaemien healsoeviermie oažžu 380 000 ruvnnu doarjjan ovdaprošektii mii galgá vástidit dasa lea go sámi dearvvašvuođajoavku dat mii boahtteáiggis čoavdá sámi álbmoga dearvvašvuođabálvalusaid organiserema. Álttá siida As kulturviessu oažžu 280 000 ruvnnu deaivvadansadjái Álttá suohkana sámi vuorrasiid várás.

Ođas | Almmuhuvvon

Lullisámi dearvvašvuođafierpmádat lea daid sámi dearvvašvuođabargiid fierpmádat, geat barget ovttaárvosaš dearvvašvuođabálvalusaid ovddidemiin lullisámeguovllu sámi álbmoga várás. Fierpmádat háliida ovddidit dakkár dearvvašvuođabálvalusmodealla sámi álbmoga várás, mii sáhtášii leat ávkin olles sámi álbmogii.

Organiseret dearvvašvuođabálvalusaid ođđa vuogi mielde

Váldoprošeakta galgá iskat sáhttet go fágaidgaskasaš bargojoavkkut, mas leat suohkaniid ja dearvvašvuođadoaimmaid dearvvašvuođabargit mielde, geat erenoamážit fuolahit sámi buhcciid, leat boahtteáiggi vuohki mo organiseret dearvvašvuođabálvalusaid sámi álbmoga várás. Dat lea oaivaduvvon Alaska/South Central foundation modealla vuođul, mas álgoálbmogat addát dearvvašvuođavehkiid álgoálbmogiidda, ja lea organiserejuvvon nu gohčoduvvon mikrojovkkožin buhcciid/bearrašiid várás. Ovdal váldoprošeavtta dárbbašuvvo ovdaprošeakta, mii galgá plánet ja láhčit vuođu váldoprošektii.

DSC_1847.JPG

Sámediggeráđđi Mikkel Eskil Mikkelsen

FOTO | Govven: Åse M.P. Pulk/Sámediggi

– Muhtun iskkadeamit čájehit ahte sámit leat uhcit duhtavaččat dearvvašvuođabálvalusaiguin go eará norgalaččat ja sis lea uhcit luohttámuš Norgga dearvvašvuođalágádussii. Danne lea buorre ja deaŧalaš ahte lullisámi dearvvašvuođafierpmádat Åarjelsaemien healsoeviermie dál organiseregoahtá dearvvašvuođabálvalusaid sámi álbmoga várás ođđa vuogi mielde, ja mii doaivut ahte dát modealla sáhttá leat ovdagovvan dearvvašvuođabálvalusaide olles sámi álbmoga várás, dadjá sámediggeráđđi Mikkel Eskil Mikkelsen.

Deaivvadansadji Álttá vuorrasat sápmelaččaide

Sámediggeráđđi lea maid juolludan Álttá Siidda kulturvissui 280 000 ruvdnosaš doarjaga, mii galgá geavahuvvot deaivvadansadjái Álttá suohkana vuoras sápmelaččaid várás. Dannego dárogiella lea nu gievra Álttás, de oaidná Álttá Siidda kulturviessu dárbbašlažžan ásahit sámi deaivvadansaji suohkana sámi vuorrasiid várás, gos sii sáhttet geavahit iežaset giela, oahpásmuvvat ja deaivvadit eará sámi vuorrasiiguin.

– Deaivvadansadji sámi vuorrasiid várás lea deaŧalaš doaibmabidju loaktima várás ja dearvvašvuođaeastadeami várás, ja sáhttá leat mielde uhcidit dearvvašvuhtii guoski váttisvuođaid ovdamearkka dihtii doaimmahisvuođa, oktovuođa, isolašuvnna ja deprešuvnna geažil. Sámi vuorrasiin lea dárbu deaivvadit ja erenoamážit dat sáhttá leat deaŧalaš dain guovlluin gos eai leat šat nu ollu sápmelaččat, dadjá Mikkelsen.

Jearahallama addá sámediggeráđđi Mikkel Eskil Mikkelsen, tel. +47 917 42 161, mikkel.eskil.mikkelsen@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!