PRD: Sámediggeráđđi áŋgiruššá ain rájárastá giellabargguin

Sámediggeráđđi lea juolludan 255 000 ru doarjaga prošektii Deanuleagis sámástit. 

Ođas | Almmuhuvvon

Prošeavtta ulbmilin lea ásahit fierpmádaga Deanuleagi gielddaguovddážiid gaskka buoridan dihtii sámegiela geavaheami sierralágan giellaarenaid bokte. Dat guoská virtuála oahppanbirrasii, innoatiivvalaš giellaarenaide, gulahallamii ja guovttegielat pedagogihkkii ovttasbargguin Ohcejoga gielddain Suomas. 

Deanuleagi sámiin leat guhkes árbevierut go guoská oktasaš gillii ja kultuvrii, ja duddjomii ja gos luohti ain eallá. Danne lea rájá rastá ovttasbargu lunddolaš. Sámediggeráđđái lea deaŧalaš doarjut giellaprošeavttaid mat leat mielde sihkkarastimin rájárasttideaddji giellaovttasbarggu. 

– Mun oainnán ahte prošeavttas áigot geavahit innoatiivvalaš čovdosiid giellabarggus man oktavuođas gaskavuođaid nannen rájá rastá ássiid gaskka Deanuleagis lea fokusis. Dát dávista sámediggeráđi politihkalaš mihttomeriide ja doalaha ahte rájit eai galgga hehttet ovdáneami, dadjá sámediggeráđđi Mikkel Eskil Mikkelsen (NSR). 

Sámediggeráđis leat buorit vásihusat vásttolaš prošeavttaid doarjumis. Sámediggi lea ovdal ge juolludan doarjaga rájárasttideaddji skuvlaprošeavttaide seamma guovllus. 

– Dát ovttasbargu lea doaibman bures, muhto mii dárbbašat ovttasbarggu riikarájáid rastá maiddái eará arenain. Dán lágan prošeavttaiguin lihkostuvvat buoremusat go lea buorre báikkálaš faggi. Dán oktavuođas leat giellaguovddážat deaŧalaš aktevrrat mat ohcalit ovttasbargui ovddidanvugiid, dadjá Mikkelsen.

Mikkelsena mielas lea hui deaŧalaš ahte erenoamážit mánát ja nuorat gulahallet iežaset ahkásaččain sámegillii. 

– Vásihusa vuođul diehtit mii ahte suomagiella dahje dárogiella leat váldogielat ollu sámi mánáid gaskkas. Dát fenomena lea seamma Norgga ja Suoma bealde Deanuleagis. Rájá rastá lea baicce sámegiella dávjá áidna dábálaš giella, danne lea geavaheapmi lunddolaš. 

Sámegiela ealáskahttimis Deanuleagis leat hástalussan guhkes gaskkat ja unnán olbmot. Danne dárbbašuvvojit ođđa čovdosat giela oahppamii ja geavaheapmái beroškeahttá guhkes gaskkain. 

– Prošeakta vuođđuduvvo innoatiivvalaš čovdosiidda ovttas árbedieđuiguin ja dat lea biddjojuvvon gasku ovtta guovllu mii eahpelunddolaččat lea juhkkojuvvon riikarájáiguin. Dát buktá buori, dadjá Mikkelsen loahpas. 

Jearahallama addá ja vástida gažaldagaide sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no.

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!