PRD: Sámediggeráđđi addá doarjaga doaibmabijuide maiguin buoridit sámiide dearvvašvuođabálvalusaid

Sámediggeráđđi lea juolludan doarjaga oktiibuot 1,7 miljon ru sierra dearvvašvuođa- ja sosiálaprošeavttaide. Doarjja lea addojuvvon ođđa SAMINOR-iskkadeapmái, sámi mánáidsuodjalusa fierpmádahkii, sámi vuorasolbmuid dearvvašvuođa deaivvadeapmái ja sámi teavstta ja jiena bidjamii váibmovuolggaheddjiide.

Ođas | Almmuhuvvon

Sámediggi lea addán doarjaga 450.000 ru Sámi dearvvašvuođadutkama guovddážii Norgga árktalaš universitehtas Romssas ulbmillaš dearvvašvuođadutkamii máŋggakultuvrralaš birrasis.

– Go galgá sihkkarastit boahtteáiggi dárbbu ovttaárvosaš ja buriide dearvvašvuođabálvalusaide sámi álbmoga várás, de fertet diehtit eanet dan birra movt lea dillii min dearvvašvuođas ja dearvvašvuođabálvalusain dál, dadjá sámediggeráđđi Mikkel Eskil Mikkelsen.

Sámedikki doarjja manná ođđa dearvvašvuođa- ja eallindilleiskkadeami álggaheapmái, SAMINOR 3.

– Mii leat sorjavaččat das ahte dutkanbirrasiin mat dutket ja kártejit sámi álbmoga dearvvašvuođa leat buorit rámmaeavttut, ja Sámediggi áigu dainna doarjagiin váikkuhit dan.

Sámi mánáidsuodjalusa fierpmádaga ásaheapmi

500.000 ruvdnosaš doarjja lea juolluduvvon Guovdageainnu suohkana mánáidsuodjalabálvalussii sámi mánáidsuodjalusa fierpmádaga ásaheapmái sámi giellahálddašanguovllus.

– Sámediggi lea fuolas das ahte ollašuvvet go sámi mánáid vuoigatvuođat mánáidsuodjalusa fuolahusas go leat sápmelaččat. Mii oaidnit ahte lea deaŧalaš láhčit vuogádagaid nu ahte mánáidsuodjalanbálvalus boahtá ávkin sámi mánáide. Danne lea sámediggeráđđi juolludan doarjaga Guovdageainnu suohkanii mánáidsuodjalusa fierpmádaga ásaheapmái sámi suohkaniin, dadjá Mikkelsen.

Dearvvašvuođadeaivvadeapmi sámi vuorasolbmuid várás

Sámediggi lea maiddái juolludan doarjaga dearvvašvuođadeaivvadeapmái sámi vuorasolbmuid várás Oslos ja Kárášjogas. 225.000 ruvdnosaš doarjja lea juolluduvvon Oslo sámi vissui ja 140.000 ruvdnosaš doarjja lea addojuvvon Eisevárluhpu eaktodáhtolašguovddážii Kárášjogas.

– Dearvvašvuođa deaivvadeamit sámi vuorasolbmuide leat deaŧalaš doaibmabijut loaktima ektui ja eastadeaddji doaibmabidjun. Sámi vuorasolbmot dárbbašit deaivvadit ja erenoamážit das sáhttá leat ávki gávpogiin ja guovlluin gos eai ása nu ollu sápmelaččat, muhto maiddái guovlluin gos sámit leat eanetlogus lea dearvvašvuođadeaivvadeapmi deaŧalaš doaibmabidju vuorasolbmuid dearvvašvuhtii, dadjá Mikkelsen.

Sámegiel teaksta ja jietna váibmovuolggaheddjiide

Sámediggi lea juolludan 155.000 ruvdnosaš doarjaga maiddái Definor AS:ii mii galgá ráhkadit sámegiel teavstta ja jiena váibmovuolggaheddjiide.

– Huššadilis sáhttá leat mearrideaddji deaŧalaš beassat gulahallat iežas gillii. Sámediggái lea deaŧalaš ahte mii oažžut reaidduid mat sáhttet veahkehit min go mii gártat heahkkadillái, dadjá sámediggeráđđi Mikkel Eskil Mikkelsen.

Jearahallama addá sámediggeráđđi Mikkel Eskil Mikkelsen, +47 917 42 161

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!