PRD: Sámediggepresideanta vuolgá Selbui maŋŋel anti-sámi čoahkkima

Máŋggas leat váldán oktavuođa sámediggepresideanttain Aili Keskitaloin čoahkkima birra maid Selbu utmarksråd ja Roltdalen allmenningsstyre lágideigga Selbus ikte, ja man ulbmiljoavkun ledje earret eará politihkkárat.

37251337744_879ec3a73d_k.jpg
FOTO | Aili Keskitalo (Foto: Kenneth Hætta)

Ođas | Almmuhuvvon

Čoahkkimii ledje bovden logaldalliid geat guhkit áigge leat juohkán boasttudieđuid ja konspirašuvnnaid sápmelaččaid, sámi rivttiid ja Sámedikki birra.

– Eamiálbmogiid eksistensii, rivttiide ja boahtteáigái ii leat sadji dan demokratiijas ja dásseárvvus maid sii bealuštit. Sáttasátni mii doppe ovddiduvvui vearáskahttá debáhttavuoiŋŋa sámi áššiin ja eandalii lullisámi guovllus, dadjá fuolastuvvan sámediggepresideanta.

Čoahkkimis ledje máŋga sápmelačča geat celke vuostá.

– Áiggun rámiidit sápmelaččaid ja earáid geat čoahkkimis celke vuostá, vaikke lágideddjiid bealis sii áibbas čielgasit eai lean buresboahtimat searvat čoahkkimii. Lean duođaid hirpmástuvvan oaidnit raporttaid das ahte sámi eanaeaiggát álggos gildojuvvui searvat čoahkkimii, dadjá sámediggepresideanta.

Sámediggepresideanta lei juo ovdal čoahkkima váldán oktavuođa Selbu sátnejođiheddjiin ja bivdán ahte ii searvva čoahkkimii. Lea maiddái šiehtaduvvon čoahkkinastit Selbus.

– Háliidan deaivat sátnejođiheaddji ja eará suohkanpolitihkkáriid, informeren dihtii Sámedikki, sámi rivttiid ja konsultašuvdnaláhkaárvalusa birra. Áiggun maiddái lullisámi birrasiid ovddasteddjiid bovdet mielde, loahpaha sámediggepresideanta.

Odne meannuda Sámediggi cealkámuša áššis.

Oktavuođadieđut:Sámediggepresideanta Aili Keskitalo, tlf. +47 971 29 305

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!