PRD: Riikarevišuvdna raportere Sámedikki doaimma birra 2018

Riikarevišuvdna lea guovtti hálddašarevišuvnnas geahčadan Sámedikki doaimma lagabuidda. Raporttat leat oassin Sámedikki barggus viidáseappot stivrenvuogádaga buoridemiin sihkkarastin dihtii buori ulbmilolahusa.  

Ođas | Almmuhuvvon

Riikarevišuvdna lea guovtti raporttas, Sámedikki stivrenvuogádaga revišuvdna ulbmilolahusa ektui ja Revišuvdna doarjjamearrádusaid ákkastallamis Sámediggeráđis ja Sámedikki váiddalávdegottis, geahčadan lagabuidda Sámedikki stivrenvuogádaga.

Riikarevišuvdna konkluderere earret eará ná:

«Sámediggeráđis ii leat stivrenvuogádat čálalaš rutiinnaiguin mii livččii ulbmillaš sihkkarastin dihtii ulbmilolahusa Sámedikki mearrádusaide ja eavttuide dávistettiin. Geavahusas čovdet dattetge sihke mielbargit ja jođiheaddjit doaimmaid vásihusvuđot máhtu ja stuorra áŋgiruššama bokte Sámedikki parlameantta várás.»

Revišuvdna čujuha maiddái ahte Sámedikki ekonomiijanjuolggadusain eai válddahuvvo stivrenproseassat vuogádatlaččat, ja lea eahpečielggas guđe mihttomearit stivrejit doaimma.

Sámediggeráđđi váldá dan maid revišuvdna lea oaidnán mielde viidáset bargui ja lea buorre go Riikarevišuvdna lea vuoruhan Sámedikki stivrenvuogádaga iežas hálddašanođastusas.

- Sámedikkis organisašuvdnan leat ollu doaimmat ja ovddasvástádus ollu surggiin, mii dahká ahte dat lea áidnalunddot norgga hálddašanoktavuođas. Mis lea oahppavaš organisašuvdna ja mii háliidat ahte min doaibma kritihkalaččat árvvoštallojuvvo vai mii dađistaga sáhttit buoridit ja ovddidit iežamet, dadjá sámediggeráđđi Henrik Olsen.

Njulget áššiid

Sámediggeráđđi lea juo álggahan raporttaid čuovvulanbarggu.

- Mii leat álggahan barggu earret eará dan ektui ahte geahčadit min čálalaš rutiinnaid sihkkarastin dihtii ahte buot ossodagain lea seammalágan čuovvuleapmi ja raporteren. Mis lea maiddái fokus eanet boađusčujuheaddji raporteremii min dokumeanttain, nugo jahkedieđáhusas ja ráđi dieđáhusas, dadjá sámediggeráđđi.

Riikarevišuvdna čállá iežas nuppi revišuvdnaraporttas doarjjamearrádusaid birra Sámediggeráđis ja Sámedikki váiddalávdegottis ná:

« Eanaš doarjjaáššiin maid sámediggeráđđi meannuda leat duođaštuvvon ákkat mat dávistit njuolggadusaide. Dat leat áššiin main sámediggeráđđi dahká mearrádusa hálddahusa evttohussii dávistettiin. Áššiin mat eai leat galle, main mearrádus ii dávis hálddahusa evttohussii, eai gávdno iskanvejolaš ákkat. Prinsihpalaččat lea eahpeoiddolaš go ráđđi ii duođaš iežas mearrádusaid dáin áššiin.”

Sámediggeráđđi áigu čuovvulit dán viidáseappot.

- Mii oaidnit ahte lea dárbu ráhkadit čielgaseappo rutiinnaid sihkkarastin dihtii buori ákkaid mearrádusaide ja mat buorebut čielggasmahtášedje movt mearrádusat dávistit doarjjanjuolggadusaide, dadjá Olsen.

Nana áŋggirdeapmi ja čađahandáidu

Riiikarevišuvdna čállá ahte «Sámedikki bargit čájehit stuorra hálu oahppat ja ovdánit buot dásiin ja čađahit doaibmabijuid buoridan dihtii heittotvuođaid das mii lea albmosii boahtán.”

- Mun lean ilus go Riikarevišuvdna lea maiddái oaidnán ahte Sámedikki bargit leat hui áŋgirat ja organisašuvnnas lea buorre dáidu čađahit buoridandoaibmabijuid. Sámediggi lea ollu jagiid álggahan ollu doaibmabijuid ovddeš revišuvnnaid rávvagiid mielde, dadjá Olsen.

Sámediggi lea earret eará rievdadan ulbmilolahus- ja raporterengáibáduseavttuid, ja leat buoridan gelbbolašvuođa njuolggadusaid hábmemis. Dál orru maid ahte reviderejuvvon bušeahtas biddjojuvvo ruhta ođđa digitála doarjjahálddašanvuogádaga várás.

- Dál mii leat geahčadišgoahtán revišuvnna fuomášuhttimiid jagi 2018 ektui ja árvvoštallat doaibmabijuid maid ferte álggahit. Mun vuorddán buori proseassa, dadjá sámediggeráđđi Henrik Olsen loahpas.

Gulahallanolmmoš media ektui:Henrik Olsen, telefovdna 907 75 219 dahje e-poasta: henrik.olsen@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!