PRD: Rámida Guovdageainnu suohkana go mearridii rahpat geainnu

Sámediggeráđđi Silje Karine Muotka (NSR) oaivvilda ahte Guovdageainnu suohkan lea dahkan deaŧalaš mearrádusa boazodoalu doarjumis, go áigu rahpat geainnu Biedjovággái mii dálvet lei giddejuvvon. Sámediggeráđđi doarju doaibmabiju ekonomalaččat.

Ođas | Almmuhuvvon

– Sámediggeráđđi lea ožžon máŋga rávvaga váikkuhit dán doaibmabidjui, sihke siskkáldasat Sámedikkis ja min ovttasbargoguimmiid beales. Dát lea buorre ja riekta doaibmabidju, mii lea deaŧalaš boazodollui, dadjá sámediggeráđđi Silje Karine Muotka.

IMG_E3390.JPG

Sámediggeráđđi Silje Karine Muotka

FOTO | Åse M.P. Pulk/Sámediggi

Guovdageainnu suohkan lea riikka stuorámus boazodoallosuohkan ja sámediggeráđđi rámiida suohkana álgaga. Sámediggi addá 30.000 ru dán doaibmabidjui mii lea rehkenastojuvvon máksi sullii 45.000 ru.

– Dát lea unna ekonomalaš doaibmabidju, mas šaddá stuorra geavatlaš mearkkašupmi boazodolliide, go sii sáhttet geasehit fuođđariid bohccuide stuorát biillaiguin. Dat lea mealgat hálbbit go geasehit ovdamearkka dihtii skohteriin, maid ollugat dál fertejit dahkat. Mii leat movtta go sáhttit veahkehit váttis dilis, dadjá Muotka.

Guohtonroassu boazodoalus

Boazodoallu vásiha dál vearrámus heahtedili dan geažil go lea ollu muohta mii lea lohkkadan guohtumiid. Eanaš boazodoallit leat juo ferten biebmat bohccuid fuođđariiguin ja suinniiguin mánnoviissaid.

– Muhtumat leat ferten geasehit fuođđariid sihke helikopteriin ja eará eahpedábálaš fievrruiguin nugo ovdamearkka dihtii bealtamohtorfievrruiguin. Dát lea dieđusge liigegollu ealáhussii mii juo gillá, dadjá sámediggeráđđi Silje Karine Muotka.

Sámediggeráđđi lea ilus go Eanadoallo- ja biebmodepartemeanta ja Norgga Boazosápmelaččaid Riikasearvi leat ožžon šiehtadus Suodjalusain veahki oažžumis boazodollui fuođđariid ja sullasaččaid geaseheapmái.

Eanet dieđuid addá sámediggeráđđi Silje Karine Muotka, tel: 98487576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!