PRD: Pilohtamánáidgárddit mánáidgárdeprošeavttas leat dál válljejuvvon

Sámediggeráđđi lea válljen njeallje pilohtamánaidgárddi mat SáMOS-prošeavtta bokte galget leat mielde hábmeme sámi mánáidgárddi boahtteáiggi.

SáMOS-logo.jpg

Ođas | Almmuhuvvon

Dat njeallje mánáidgárddi mat dán vuoru leat válljejuvvon pilohtamánáidgárdin leat: Suaja maanagierte Snåases, Álttá siida AS Álttás, Árran mánájgárdde AS Ájluovttas ja Badjemánáid beaiveruoktu AS Kárášjogas.

Prošeakta SáMOS - Sámi mánát ođđa searvelanjain galgá viđa jagis rievdadahttit sámi mánáidgárdestruktuvrra sámi filosofiija ja árbedieđuid vuođul. SáMOS pilohtamánáidgárddiid ortnega ulbmil lea sámáidahttit mánáidgárddi ja dakko bokte addit vuođu Sámedikki SáMOS-prošektii, ovddidan dihte sámi mánáidgárdepedagogihka ja bargovuogi, sámi vuođđojurdagiid mielde.

– Dál SáMOS-prošeakta lea ollen dan muddui ahte konkrehtalaččat galgá dutkat ja ovddidit sámi bargovugiid ovttas sámi mánáidgárddiiguin. Šaddá miellagiddevaš čuovvut sámi pedagogalaš ovdáneami ovddasguvlui, dadjá sámediggeráđđi Mikkel Eskil Mikkelsen (NSR).

Pilohtamánáidgárdeortnegii bohte ovcci ohcama. Okta ohcciin ii olahan gáibádusaid beassat pilohtamánáidgárdin. Go válljejedje pilohtamánáidgárddiide, de lei eaktu ahte unnimusat okta lea julevsámeguovllus, unnimusat okta lullisámeguovllus ja ahte davvisámeguovllus válljejuvvojit sihke riddoguovlluin, gávpogiin ja siseatnamis.

– Sámediggi lei háliidit ahte buot gávccis livčče galgan beassat pilohtamánáidgárdin dál juo, muhto resurssaid geažil fertet álggahit ovdánahttinbarggu njealji mánáidgárddis dán vuoru, dadjá Mikkelsen.

Sámediggeráđđi mearridii maid ahte go nuppi vuorus rahppo vejolašvuohta ohcat pilohtamánáidgárdin, de leat mánáidgárddit mat eai vuoruhuvvon dán háve mielde árvvoštallamis ovttas vejolaš ođđa ohcciiguin. Dat mánáidgárddit leat: Luvlege maanagierte ja Ysterhagen barnehage avd. Svaale Rørosis, Goržži mánáidgárdi Gáivuonas, Guovddáš mánáidgárdi Álttás ja Guovssahas mánáidgárdi Romssas.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no.
Eanet dieđuid prošeavtta birra addá SáMOS prošeaktajođiheaddji Ol-Johán Sikku, +47 902 23 804, ol.johan.sikku@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!