PRD: – KEiiNO lea buorre giellaambassadevra

Sámediggepresideanta Aili Keskitalo lea ilus go KEiiNO-joavku galgá ovddastit Norgga Eurovision Song Contest lávlungilvvus. Dákko bokte fuomášuhttet sii sámegiela ja sámi kultuvrra, dadjá presideanta.

Ođas | Almmuhuvvon

Dán jagi lea riikkaidgaskasaš álgoálbmotgiellajahki (IYIL2019) mas ulbmil lea čalmmustahttit ja ovddidit álgoálbmotgielaid dili. KEiiNO-joavku, mas sámi artista Fred Buljo lea mielde, vuittii mannan lávvardaga Norgga Melodi Grand Prix-finála. Sin šuokŋa Spirits in the sky seaguha eaŋgalasgiela sámegielain ja luđiin, ja dál beassá olles Europa vásihit sihke sámegiela ja sámi kultuvrra go KEiiNO-joavku lávke lávddi nala Tel Avivas miessemánus.

– Heive hui bures ahte Eurohpá beassá gullat sámegiela Eurovision Song Contest lávlungilvvus juste dán jagi go lea álgoálbmotgiellajahki. Sii loktejit álgoálbmotgiela stuorra lávdái ja leat nu buorit giellaambassadevrrat, dadjá Keskitalo.

Politihkas luohtái

Fred Buljos, gean buoremusat dovdat Duolva Duottar rap-joavkkus, leat maid eará attáldagat go musihkka. Son lea leamaš Árjja bellodaga sámediggeáirras 2016–2017 áigodaga ja sadjásaš áirras 2013–2016 áigodaga. Mannan lávvardaga čájehii vel juoiganattáldagaid olles Norgii.

– Lea hui somá gullat luođi veahá earálágan dilálašvuođas. Mu mielas son lei hui čeahppi juoigat, dadjá sámediggepresideanta.

Ealas fináladoalut

Sámediggeráđđi Henrik Olsen lei geahččame Melodi Grand Prix lávlungilvvu finála Oslo Spektrumas. Son dadjá ahte finála lei hirbmat somás vásáhus ja ahte šattai erenoamáš ealás go vuoiti nammaduvvui. Sámediggeráđđi šattai maid hui rámis go KEiiNO vuittii.

– Lei alla dássi ja ollu buorit lávlagat. Lean movttet go luohti ja sámegiella dál fas gullo Eurovision oktavuođas. Sávan lihku jovkui ja olles Sápmái. Mii illudat čuovvut Fred Buljo ja KEiiNO-joavkku viidáset, dadjá Olsen.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!