PRD: Háliida julevsámi dearvvašvuođafierpmádaga

Sámedikki dievasčoahkkin celkkii mannan vahkus ahte háliidit dearvvašvuođafierpmádagaid ásahuvvat, mat sáhttet sihke organiseret dearvvašvuođabargiid ja váikkuhit ovttaárvosaš dearvvašvuođabálvalusaid ovddideapmái. – Mun sávan ahte julevsámi dearvvašvuođafierpmádat ásahuvvošii čakčat, erenoamážit go ođđa Hápmira suohkan dál ásahuvvo, dadjá sámediggeráđđi Mikkel Eskil Mikkelsen.

Ođas | Almmuhuvvon

Sámediggi oaidná ahte lea dárbu organiseret sámi dearvvašvuođabargiid ulbmillaš vuogi mielde sihke nationála ja báikkálaš dásis. Sámedikki dievasčoahkkin celkkii mannan vahkus ahte dán lágan sámi fágafierpmádaga ásaheapmi berre vuoruhuvvot sámi guovddášguovlluin. Máttasámi guovllus leat sámi dearvvašvuođabargit organiseren iežaset ja sii háliidit čađahit prošeavttaid maid bokte fállet ovttaárvosašvuođa dearvvašvuođabálvalusaid siskkobealde. Fágabirrasa ja fierpmádaga ásaheami oktavuođas sámi guovddášguovlluin, váldet ovttaárvosaš dearvvašvuođabálvalusfálaldagat vuolggasaji sámi servodaga dárbbuin.

– Mii oaidnit ahte sihke vuođđodearvvašvuođabálvalusas ja spesialistadearvvašvuođabálvalusas leat stuorra hástalusat go galget fállat ovttaárvosaš dearvvašvuođabálvalusaid sámi álbmogii. Julevsámi dearvvašvuođabargit berrejit oahppat das mii lea dahkkojuvvon máttasámi guovllus ja ásahit sullasaš fierpmádaga, dadjá Mikkelsen.

IMG_E3509.JPG

Sámediggeráđđi Mikkel Eskil Mikkelsen

FOTO | Åse M.P. Pulk/Sámediggi

Sámediggi ja Davvi Dearvvašvuohta barget stuorát ovddidanprošeavttain, mas plánejit sámi dearvvašvuođabálvalusaid nationála dásis. Guovddážis dán prošeavttas lea sámi dearvvašvuođabargiid váilun. Dasto ásahuvvo ođđa Hápmira suohkan, man oktavuođas leat seamma hástalusat áigeguovdilat.

Mikkelsen dadjá ahte sámi dearvvašvuođabargiid váilun lea hástalus, ja ahte danne ferte fuolahit dan ahte dat vátna bargit geavahuvvojit ulbmillaččat ja njuovžilit.

– Sámi dearvvašvuođa bargit fertejit ieža leat mielde bidjamin eavttuid dasa, go dat leat guovddážis ovttaárvosaš dearvvašvuođabálvalusaid duohtandahkamis. Go jurddašit daid proseassaid mat mis leat nationála ja báikkálaš dásis, de galggašedje julevsámi dearvvašvuođabargit ásahit fierpmádaga mii sáhttá leat veahkkin ja leat mielde bidjamin eavttuid.

Mikkelsen háliida ahte eanet struktuvrrat ja rámmat boađášedje sisa sámi dearvvašvuhtii ja vuordá mielas ovttasbarggu julevsámi dearvvašvuođafierpmádagain.

– Mii dárbbašat eanet struktuvrraid sámi dearvvašvuođabálvalusaid oktavuhtii, ja julevsámi dearvvašvuođafierpmádat attášii gelbbolašvuođa maid mii maiddái Sámedikkis dárbbašat. Sámedikki dievasčoahkkin lea čielgasit dadjan ahte mii fertet oažžut saji eanet fierpmádagaide ja dan mii áigut sámediggeráđi beales čuovvulit, dadjá sámediggeráđđi Mikkel Eskil Mikkelsen loahpas.

Jearahallama addá sámediggeráđđi Mikkel Eskil Mikkelsen, tel. +47 917 42 161.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!