PRD: Guolásteddjiid ferte gullat bieggafápmoprošeavttaid oktavuođas merrii

Sámediggeráđđi Silje Karine Muotka oaivvilda ahte váikkuhusat guolástusealáhussii fertejit čielggaduvvot ovdal go huksejuvvojit merrii bieggapárkkat Sandskallen-Sállan Davvi guvlui Hámmárfeasttas. Sámediggi oaivvilda ahte guolásteddjiid ferte gullat dan oktavuođas go evttohuvvo mearraenergiija huksen.

Ođas | Almmuhuvvon

Silje Karine Muotka.jpg
FOTO | Sámediggeráđđi/sametingsråd Silje Karine Muotka (Foto: Kenneth Hætta)

– Mun oainnán gulaskuddancealkámušain ahte guoskevaš guolásteaddjit ja guolástusorganisašuvnnat vuostálastet garrasit Sandskallen-Sállan Davvi rahpama bieggafápmobuvttadeapmái. Dán ákkastit dainna go das leat hui stuorra negatiivvalaš váikkuhusat guolástusealáhussii. Dárbu lea deattuhit guolástusealáhusa luondduvuđđosa, mii lea leamaš geađgejuolgin dáid smávva gilážiidda don doloža rájes, dadjá sámediggeráđđi Silje Karine Muotka, ja deattuha ahte guolásteaddjit fertejit guldaluvvot dán ášši oktavuođas.

Oljo- ja energiijadepartemeanta lea evttohan rahpat guokte fealtta mearraenergiija huksemii, Utsira Davvi ja Sandskallen-Sállan Davvi. Sámedikki mielas sáhttet guoskevaš guovlluin Sandskallen-Sállan Davvi leat váikkuhusat sámi kultuvrra ja ealáhusbarggu luondduvuđđosii.

Máhttu «Strategisk konsekvensutredninger for havvind» nammasaš 2013 čielggadusas, ja dán gulaskuddamis boahtán gulaskuddancealkámušain oaidnit čielga gova ahte Sandskallen-Sállan Davvi lea guolásteddjiide deaŧalaš ja lagaš bivdoguovlu, ja fágaossodagat, Guolástusdepartemeanta ja Guolástusdirektoráhta ja guoskevaš guolástusorganisašuvnnat leat maiddái rávven ahte eai raba Sandskallen-Sállan Davvi mearraenergiija huksemii.

– Jos Oljo- ja energiijadepartemeanta háliida vuostálastit fágaeiseválddiid rávvagiid, de berre vejolaš váikkuhusaid guolástussii čielggadit eanet ovdal go vejolaš mearrádus dahkkojuvvo. Dákkár čielggadus berre sisdoallat bivdobáikki vahátárvvoštallamiid ja maid dat mearkkaša guolásteddjiide geat leat sorjavaččat resurssas, ja váikkuhusaid mat čatnasit bargosajiide vuostáiváldinrusttegis nannámis, dadjá Muotka.

Sámediggi lea bivdán konsultašuvnnaid Oljo- ja energiijadepartemeanttain ášši birra maŋŋá go gulaskuddan lea loahpahuvvon ja ovdal go dahkkojuvvo loahpalaš mearrádus departemeanttas.

Gažaldagaide vástida dahje addá jearahallama sámediggeráđđi Silje Karine Muotka, mob. +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!