PRD: Giellaprošeavttaide juolludan doarjaga

Sámediggeráđđi lea juolludan doarjaga golmma giellaprošektii dán jagi maŋemus ráđđečoahkkimis. Kárášjoga giellaguovddáš, Guovdageainnu ja Kárášjoga oktasaš nuoraidskuvlaprošeakta ja gielddasámi sátnelistu ožžot oktiibuot 800 000 ruvnno doarjjan.

Ođas | Almmuhuvvon

Kárášjoga gielda oažžu nuppi jagi álggahandoarjaga Kárenaš giella- ja kulturguovddážii. Sii leat boahtán johtui doaimmaiguin ja leat plánen doaimmaid moadde jagi ovddasguvlui. Sámediggi lea juolludan 400 000 ruvdnosaš doarjaga giellaovddidandoaibmabijuide.

37058259423_77c4360cd8_z.jpg
FOTO | Aili Keskitalo (Foto: Kenneth Hætta)

– Kárášjoga gielddas leat leamaš váttisvuođat virgádit olbmuid prošeavtta bargguide, ja raporteremat leat nu maŋŋonan. Mii oaidnit Kárášjoga dárbbu giellaguovddážii ja seammás ipmirdit ahte rutiinnat eai leat vel sajis. Sámedikki mielas lea hui dehálaš veahkehit Kárášjoga gieldda giellaguovddáža ásahemiin, dadjá sámediggepresideanta Aili Keskitalo.

Oktasaš nuoraidskuvlaprošektii doarjja

Guovdageainnu suohkana nuoraidskuvla lea ohcan doarjaga ovttas Kárášjoga gieldda skuvllain suohkangaskasaš seminárii oahpaheddjiid várás, ja sámediggeráđđi juolluda dása 300 000 ruvdnosaš doarjaga. Semináras galget logaldallamat sámi árvvuid birra ja fágaođastusa birra. Mihttu lea maid oahpásnuvvat sámi oahpahusfierpmádagaiguin, doppe galgá bargobádji, ja skuvllat galget ovdanbuktit iežaset plánaid muđui.

Prošeavtta namma lea Davvisámegiella skuvllas, mii gullo, oidno, vuhtto ja ovdánahtto, ja mihttu lea deaivvadit, oahpásnuvvat ja hukset oadjebasvuođa ránnjásuohkaniid pedagogaid gaskka, juogadit čehppodaga, ráhkadit oktasaš plánaid sámegiela oahpahussii, ja ráhkadit plána movt heivehit sámegiela buot fágaide sámi skuvllain.

– Dát prošeakta heive bures Giellaloktemii, mii lea Sámedikki strategiija sámi gielaid várás. Mii oaidnit ahte dárbbašuvvojit erenoamáš gealboloktenstrategiijat oahpaheddjiide, earret eará sámegiel čállin- ja lohkanoahpahusa ektui, guovttegielalašvuođapedagogihkas, nana oahpahusmodeallaid geavaheamis ja vugiin mat dahket ahte giellaoahpahus lihkostuvvá, dadjá Keskitalo.

Ruošša-gielddasámi sátnegirjái doarjja

UiT - Norgga árktalaš universitehta áigu divvut ja gárvet ruošša-gielddasámi sátnegirjji ja oažžu dasa 100 000 ruvdnosaš doarjaga.

Gielddasámi oahpaheaddji, girječálli, journalista ja giellaberošteaddji Aleksandra Antonova rohkki ja ohcci Elisabeth Scheller álggiiga prošeavttain jagi 2011:s. Sátnegirjji galgá leat álki geavahit ja giela ealáskahttin lea guovddážis. Danne go ii gávdno gielddasámi grammatihkka, de leat sátnegirjjis tabeallat mielddusin mat čilgejit vearba- ja substantiivasojahemiid ja dássemolsašumiid.

– Gielddasámegiella lea duođaid áitojuvvon giella, ja dát ođđa sátnegirji addá geavaheddjiide vejolašvuođa oahppat eanet go dušše sániid, ja lea dehálaš oassi giela ealáskahttimii, dadjá sámediggepresideanta Aili Keskitalo.

Jearahallama addá presideanta Aili Keskitalo, +47 971 29 305, aili.keskitalo@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!