PRD: Gáibida eanet bivdoeriid mearrasámi guolásteddjiide

Sámediggeráđđi Silje Karine Muotka deaivvada Ealáhus- ja guolástusdepartemeantta politihkalaš jođiheddjiiguin boahtteáiggi bivdoearrevuogádaga konsulteremii.
 

Ođas | Almmuhuvvon

Ealáhus- ja guolástusdepartemeanta ovddida miesse-geassemánu molsumis Stuorradiggedieđáhusa ođđa bivdoearrevuogádaga birra guolástusain. Sámediggi deaivvada ráđđehusain konsulteremii duorastaga miessemánu 16. b.

- Mii gáibidat mearrasámiid vuoigatvuođaid nannema, stuorát bivdoeriid vai sáhttet bivdit birgejupmin ja dasto eanet váikkuhanfámu dáid resurssaid hálddašeapmái. Midjiide lea deaŧalaš sihkkarastit ahte guollebivdit doaibmaguovllus sáhttet oažžut birgejumi guolástusas, dadjá Muotka.

Maiddái opposišuvdnajođiheaddji Ronny Wilhelmsen (Bb) searvá konsultašuvnnaide.

Mearrasámi servodaga sihkarastin

 Boahttevaš stuorradiggedieđáhus lea hui viiddis ja guoská buot fanasjoavkkuide. Sámediggi áigu váldoáššiin bargat áššiiguin main lea stuorra mearkkašupmi mearrasámi servodagaide.

- Mis lea fokus ahte buoridit sin eavttuid geat bivdet riddolagaš guovlluin ja vuotnabivddus, sihkarastin dihtii barggolašvuođa ja ássama mearrasámi guovlluin. Dat lea leamaš min vuolggasadji oppa áiggi, dadjá sámediggeráđđi.

Biras fokus

Sámediggi áigu geassit ovdan maiddái birrasa konsultašuvnnain. Jos fanas ii nagot ollašuhttit birasgáibádusa ja unnidit boaldámušgeavaheami, de ferte sis unnidit bivdoeriid ja dietnasa.

- Dat lea buorre ja ovddasvástideaddji dálkkádatpolitihkka ahte unnidit luoitimiid ealáhusas, ja mii oaivvildat ahte guollebivddu ja luossabiebmama ásahemiin ferte atnit muittus birrasa. Guollehálddašeapmi ferte leat ceavzil, ja dalle ferte duostat maiddái bidjat gáibádusaid, dadjá Muotka loahpas.

Jos áiggut jearahallama, de válddes oktavuođa sámediggeráđiin Silje Karine Muotkain, tel: 984 87 576

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!