PRD: Duodjeinstituhtta doarju Sámedikki mihttomeari sámi kultuvrra, identitehta ja kulturárbbi nannemis

Duodjeinstituhta evalueremis boahtá ovdan ahte instituhtta unnán doarju Sámedikki mihttomeari duoji ektui ealáhussan, muhto ahte Duodjeinstituhtas lea stuorra mearkkašupmi ávnnaskeahtes kulturárbbi kulturguoddin ja hálddašeaddjin.

Ođas | Almmuhuvvon , ođasmahtton

Čakčat 2018 bivddii Sámediggi Telemarksforskninga evalueret Duodjeinstituhta, mii lea bajitdási ovddidan- ja gelbbolašvuođaguovddáš duodjái olles Sámis. Evalueremis lea geahčaduvvon man dásis Duodjeinstituhtta váikkuha Sámedikki mihttomeari juksama duoji ektui, man dásis Duodjeinstituhta bagadanortnet váikkuha Sámedikki mihttomeari juksama duoji ektui ja evttoha doaibmabijuid vai ulbmilolahus ain buorránivččii. Sámedikki mihttomearri duoji ektui lea ahte mis galget leat máŋggat ealáhusaktevrrat, eanet ámmátlašvuohta ja buoret dienas ja gánnáhahttivuohta.

Duodjeinstituhta doaimma oktavuođas lea sáhka vuosttažettiin duoji birra kultuvran ja giehtaduodjin. Raporttas konstaterejuvvo ahte instituhtta unnán doarju Sámedikki mihttomeari duoji ektui ealáhussan ja ahte instituhtta ii ollásit nagot deavdit iežas mandáhta ahte doaibmat duoji ovddidan- ja gelbbolašvuođaguovddážin dan ektui go duodji lea ealáhus, kultuvra ja giehtaduodji.

Duodjeinstituhtta rollas ja dain doaimmain maid sii dahket kulturguoddin ja ávnnaskeahtes kulturárbbi hálddašeaddjin, lea dattetge stuorra mearkkašupmi. Dás váikkuhit sii Sámedikki mihttomeari nannema sámi kultuvrras, identitehtas ja kulturárbbis. 

– Duodjeinstituhtas lea deaŧalaš rolla kulturguoddin ja árbevirolaš máhtu hálddašeaddjin, dadjá sámediggeráđđi Berit Marie E. Eira.

Raporttas rávvejuvvo ahte Duodjeinstituhtta bisuhuvvo, muhto gáržžit mandáhtain. Juogo duoji gelbbolašvuođaguovddážin ávnnaskeahtes kulturárbin, dahje design, buvtta- ja márkanovddideami gelbbolašvuođaguovddážin.

– Raporttas leat máŋga molssaeavttu Duodjeinstituhta viidáset ovddideapmái, dadjá Eira.

Son deattuha ahte Sámediggi ii leat vuos dahkan oainnu guđege beliide. Vuos galgá raporta ovdanbiddjojuvvot bearjadaga 15.03 Álttás, earret eará ovttas Duodjeinstituhtain ja duodjeorganisašuvnnaiguin. Raporta lea almmolaš.

Loga raportta

– Mii bovdet buohkaid geain lea beroštupmi duodjái buktit oainnuid Sámediggái dalán go lea vejolaš, dadjá sámediggeráđđi Berit Marie E. Eira loahpas.

Jearahallama addá dahje vástida gažaldagaide sámediggeráđđi Berit Marie E. Eira, mob. 913 28 626

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!