PRD: Doarju prošeavtta Ássanmiela ohcamin

Sámediggeráđđi doarju Finnmárkku spábbačiekčanlihtu ja servodatprošeavtta Ássanmiela ohcamin 300 000 ruvnnuin. – Sámediggi oaivvilda ahte ássanmiela háhkan smávva gielddain lea deaŧalaš doaibmabidju mas leat maiddái váikkuhusat sámi kultuvrii, gillii ja servodateallimii, dadjá sámediggeráđđi Silje Karine Muotka.

Ođas: Almmuhuvvon

Áigodagas 2015-2017 čađahii Finnmárkku spábbačiekčanlihttu prošeavtta «Finnmark - mulighetenes fylke» man oktavuođas leat čađahan máŋggalágan ássanmoktaprošeavttaid sihke spábbačiekčanarena siskkobealde ja olggobealde. Prošeavttas Ássanmiela ohcamin (Jakten på bolyst) áigot sii ávkkástallat buot daid positiivvalaš vásáhusain maid ožžo dán prošeavttas, ja sii háliidit áigodagas 2018-2020 áŋgiruššat 15 unnimus gieldda ektui Finnmárkkus.

Prošeakta galgá earret eará buktit ássanmiela ja čađahanfámu sámi gielddain, ja váikkuhit dasa ahte soahpameahttunvuođat ja vuostálasvuođat unnot gielddain, dan bokte ahte čatnat oktavuođaid girjáivuođa bokte máŋggakultuvrralaš Finnmárkkus.

– Sámediggi háliida dakkár gielddaid mat geasuhit ja gosa eanet olbmot háliidit ásaiduvvat, danne dát prošeakta lea nu buorre, dadjá Muotka.

Prošeavttas lea sáhka ahte galgá leat juoga masa illuda iežas lagašbirrasis, ja juoga maid beassá iluin muitit. Mihttomearrin lea lágidit ássanmoktavahku máŋgga beaivvi badjel buot dan 15 gielddas, mas leat nuvttá doaimmat buot gielddaássiide.

Prošektii galget searvat nu viidát go vejolaš báikegottiin ja prošeakta galgá searvvahit olbmuid ja joavkkuid mat iešguđet sivaid geažil sáhttet báhcit olggobeallái doaimmaid ja doaluid mat lágiduvvojit báikkálaččat. Dasa lassin áigot bargat mánáid ja nuoraid ektui fáttáin «oadjebas báikkálašservodagat».

– Ássanmiellavahkku lea juo lágiduvvon máŋgga gielddas, ja dán rádjai leat mii gullan aivve positiivvalaš vásihusaid birra ássiin, ja mun lean movtta go sámi perspektiiva gozihuvvo dán áŋgiruššamis, dadjá Muotka loahpas.

Jos áiggut jearahallama, de váldde áinnas oktavuođa sámediggeráđiin; Silje Karine Muotka, +47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!