PRD: Doarjja ođđa sámi mánáidgárdeossodahkii Romssas

Sámediggeráđđi lea juolludan 200.000 ru Sjømannsbyen mánáidgárdái Romssas ođđa sámi ossodaga ásaheapmái.

Ođas | Almmuhuvvon

– Dát lea duohta illuášši! Romssa suohkan lea viiddidan sámegielat mánáidgárdefálaldaga gávpogis, ja eanet mánát ožžot mánáidgárdefálaldagas mii váldá vuolggasaji sámi gielas ja kultuvrras. Go dál lea ásahuvvon ođđa sámi ossodat Sjømannsbyen mánáidgárddis, de nannejuvvo sámi mánáidgárdefálaldat ja fágabiras, dadjá sámediggeráđđi Mikkel Eskil Mikkelsen gii lea movtta.

DSC_1847.JPG

Sámediggeráđđi Mikkel Eskil Mikkelsen

FOTO | Govven: Åse M.P. Pulk/Sámediggi

Sjømannsbyen mánáidgárdi lea Romssa suohkana mánáidgárdi mas leat njeallje ossodaga. Mánáidgárddis rahppojuvvui 2016:s sierra sámi ossodat, muhto sámi ossodaga rahpama maŋŋá oidne johtilit ahte dárbu lea eanet sámegielat mánáidgárdesajiide.

Go dárbu lei stuoris sámi mánáidgárdesajiide de mearridii Romssa suohkan ásahit vel ovtta sámi ossodaga mánáidgárddis, ja čavčča rájes leat leamaš guokte sámi ossodaga mánáidgárddis. Sámi ossodagat galget gozihit sámi giela, kultuvrra ja eallinvuogi, ja ossodagain leat sámegielat bargit.  

– Hui movttiidahtti oaidnit go golmma jagis sámi mánáidgárdesajit leat lassánan njealji sajis 24 sadjái, dadjá Mikkelsen.

Sámediggeráđđi juolluda 200.000 ru prošektii doarjjaortnegis doarjja prošeavttaide ja ovddidanbargui mánáidgárddiin.

Gažaldagaide vástida dahje addá jearahallama sámediggeráđđi Mikkel Eskil Mikkelsen, tel. +47 917 42 161, mikkel.eskil.mikkelsen@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!