PRD: Doarjja náveha ođasteapmái

Sámediggeráđđi lea juolludan 300.000 ru doarjjan bondii Simon Pedersenii Skániid suohkanis.

Ođas | Almmuhuvvon

Simon Pedersenis leat leamaš gusat mat njamahit gálbbiid návehis gávcci jagi ja son áigu nuppástuhttit doaimma dál vai sáhttá beavttálmahttit ja ovddidit doalu viidáseappot. Pedersen áigu ođastit dálá náveha, mas ii leat muhkkekeallir, návehin mas leat muhkkekanálat ja kanálaseaguheapmi.

Sámediggeráđđi/Sametingsråd Silje Karine Muotka

Sámediggeráđđi/Sametingsråd Silje Karine Muotka. Foto: Sara Beate Eira Persson, Sámediggi

FOTO | Sara Beate Eira Persson

Sámediggeráđđi Silje Karine Muotka lea movtta go Sámediggi doarjaga addima bokte sáhttá leat veahkkin viidáset ovddideamen doalu.

– Prošeakta áigu lasihit buvttadeami fitnodagas ja lasihit árvoháhkama eanadoalus Skániid suohkanis, dadjá sámediggeráđđi Silje Karine Muotka.

Doarjja lea juolluduvvon doarjjaortnegis Vuođđoealáhusat. Dán doarjjaortnega ulbmilin lea lasihit bargosajiid vuođđoealáhusain ovdal jagi 2025. Doarjagiin mat mannet eanadollui vuoruhuvvojit dán jagi ođasmahttimat ja dáláš doaibmavisttiid viiddideapmi, heivehandoaibmabijut ja prošeavttat mat váikkuhit rekrutteremii, buoret árvoháhkamii ja eanadoalu ovddideapmái.

– Mun doaivvun ahte doarjja nannešii bearraša bargosajiid ja ahte šattašii álkibun čuovvovaš sohkabulvii váldit badjelii doalu, dadjá Muotka.

Gažaldagaide vástida dahje addá jearahallama, sámediggeráđđi Silje Karine Muotka, mob. +47 984 87 576, silje.karine.muotka@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!