Sámediggi mearkkaša ahte boazodoallit maiddái dán jagi leat massán olu misiid goaskimiidda. Sámediggeráđđi Berit Marie Eira dadjá menddo váttisin oaččut lobi báhččit goaskimiid.

– Mu mielas Birasgáhttendepartemeantta ii váldde duođas man stuorra vahága goaskin dagaha boazodollui ja sávzadollui, dadjá Eira.

Geahččalanprošeakta mas guorahallojuvvo man stuorra vahágiid goaskin dagaha Romssa fylkkas, ii leat biddjon johtui nu mo Stuorradiggi lea eaktudan. Prošeakta galgá fátmmastit sihke boazodoalu ja sávzadoalu.

Boraspire šaddá ain stuorát ja stuorát giksin jagis jahkái, ja dál speadjá maid guovža ealu. Dán vahkus leat guokte guovžža oaguhan bohccuid Guovdageainnus ja dagahan stuorra vahágiid, nugo guovllu boazodoallit dieđihit. Dán oktavuođas lea speadjan maid dáhpáhuvvan olggobealde guovžaguovllu.

Sámediggeráđđi Berit Marie Eira oaivvilda ahte áššemeannudanáigi oažžut guovžagoddinlobi lea menddo guhkki.

– Deaŧalaš lea oažžut goddinlobi dákkár áššiin nu johtilit go vejolaš eastadan dihtii stuorát roasuid. Sámediggi vuordá ahte boraspireeiseválddit njeidet daid elliid mat spedjet ealu dalán go dat vaháguhttet. Dát guoská maid boraspiriide mat fallehit sávzzaid, dadjá Eira.

Váldet eanet vuhtii boraspiriid go guohtonelliid

Dasto dadjá sámediggeráđđi ahte Sámediggi ii leat duhtavaš dainna go Romssas ja Finnmárkkus galget leat guhtta guovžačivgga. 

– Go dát nállemihttu ii leat olahuvvon de ferte Birasdirektoráhta mearridit buot liseansabivdoohcamiid. Dat goazaha áššemeannudanáiggi, mii fas čuohcá sihke boazodollui ja sávzadollui, dadjá Eira.

Sámediggeráđđi oaivvilda ahte biraseiseválddit váldet eanet vuhtii boranávddiid go guohtonelliid, ja čujuha ahte dat ii dávis Stuorradikki mearrádussii dan birra ahte Norggas galget leat sihke guohtoneallit ja boraspiret.

– Jagis 2015 borrojedje ollu sávzzat guvžii, erenoamážit Nuorta-Finnmárkkus. Dalle ii addojuvvon guovžabáhčinlohpi. Dát lea fas okta ovdamearkka dasa ahte biraseiseválddit váldet boraspiriid eanet vuhtiii go guohtonelliid, dadjá Eira loahpas.

Jearahallan, váldde oktavuođa sámediggeráđiin Berit Marie Eirain, mob. 913 28 626

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!