– Mun vuorddán ahte ministtar ráhkkanaddá buriid ja dássásaš čovdosiid, ja lean muittuhan ministara ahte Sámediggi galgá konsulterejuvvot áššis, dadjá Keskitalo.

IMG_E1574.JPG

Sámediggepresideanta Aili Keskitalo

Govven: Åse M.P. Pulk/Sámediggi

Váilevaš čielggadeamit Romssa ja Finnmárkku fylkasuohkaniid ovttastahttima birra lea mielddisbuktán ahte fylkkat leat bázahallan proseassas ja Sámediggi ii leat beassan buktit cealkámuša ahte mot ovttastahttin sáhttá váikkuhit sámi beroštumiide.

– Stuoradikki ovttastahttinmearrádus ovdal Gardermoenšiehtadusa ii leat čielggaduvvon. Proseassa lea jođihuvvon dainna lágiin ahte Sámediggi ii leat beassan ovddidit iežas oaivila dan guovtti fylkka ovttastahttima birra ovdal go mearrádus dahkkui, dadjá vuorjašuvvan sámediggepresideanta.    

Sámediggi lea juo proseassa vuolde čalmmustahttán ahte almmolaš bargosajiid sirdin sámi guovlluide lea dehálaš sámi servodaga ovddideapmái. Jus eambbo sentraliserejuvvo de dat sáhttá láivudit sámegiela, sámi kultuvrra ja sámi guovlluid ealáhusovdáneami eavttuid. Danne lea viidásit barggus dehálaš buorebut sajáiduhttit proseassaid ja čielgaseabbo čuvget doaimmaid sirdima regionála dássái. Dasa guoská maiddái oažžut sadjái šiehtadusa mii lea vuoiggalaš sihke Romsii ja Finnmárkui.

– Dál lea lunddolaš digaštallat regionála dási doaimmaid. Sámediggi galgá meannudit ášši regionođastusa birra geassemánus. Mun lean evttohan čoahkkinastit Gieldda- ja ođasmahttinministariin Monica Mælandiin ovdal go dát ášši loktejuvvo Sámedikki dievasčoahkkimii, dadjá Keskitalo.      

Earenoamážit leat golbma beali regionođastusas mat leat áigeguovdilat Sámediggái viidásit barggus. Dat leat ođđa doaimmaid sirdin regiovnnaide main leat sámi beroštumit. Seamma maiddái ođđa doaimmaid sirdin regiovnnaide main Sámedikkis lea dahje berre leat hálddašeapmi seamma guovllus sámi servodaga várás. Viidásit mot Sámediggi sáhttá nannet ja konkretiseret iežas ovttasbarggu regionála eiseválddiiguin.

Govaid Keskitalos gávnnat dáppe. Daid oažžu friddja geavahit go kreditere govvejeaddji.

Jus leat gažaldagat, dahje áiggut jearahallama, váldde oktavuođa sámediggepresideanttain Aili Keskitaloin, +47 971 29 305

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!