PRD: Beahtahallan go ráđđehus lea miehtan Nussira ruvkeáššis

Gonagas stáhtaráđis lea odne dohkkehan Nussir ASA ruvkedoaibmakonsešuvnna Nussiris ja Gumpenjunis Riehpovuonas. – Sámediggi ii leat guorrasan dán mearrádussii, ja mun oainnán ahte dat lea duođaleamos falleheapmi sámi kultuvrra ja ealáhusbarggu ektui Álttáeanu huksema rájes, dadjá sámediggepresideanta Aili Keskitalo.

Ođas | Almmuhuvvon

Mearrádusa ahte addit doaibmakonsešuvnna Nussir ASA:i lea dahkan olles ráđđehus maŋŋá go earret eará Sámediggi lea váidán konsešuvnna maid Ealáhus- ja guolástusdepartemeanta attii guovvamánu 14. b. 2019.11.

Sámediggeráđđi Silje Karine Muotka čujuha ahte Gurutbellodat lea mielde mearrideamen vaikko ieža leat dadjan ahte eai goassige áiggo dohkkehit, ja Risttalaš álbmotbellodat lea mielde mearrideamen mas lea stuorra várra ahte álbmotrievttálaš mearrádusat álgoálbmot kultuvrra ektui rihkkojuvvojit.

– Mun in leat várra hirpmástuvvan, muhto eanemusat doaivvuhuvvan go bellodagaid oainnut ja vuođđoárvvut nu álkidit sáhttet garvojuvvot dalle go sámi kultuvrra birra lea sáhka, dadjá sámediggeráđđi Silje Karine Muotka.

Sámediggi lea guovtti dievasčoahkkinmearrádusa bokte stuorra eanetloguin čájehan čielga negatiivvalaš oainnu ruvkeprošektii Nussiris. Lassin go oppalaččat leat leamaš váilevaš čielggadusat birrasa ja guolástusa birra, čujuha Sámediggi maiddái dasa ahte eai leat leamaš duohta konsultašuvnnat eiseválddiid ja guovllu boazodolliid gaskka. Departemeanta ii leat vuhtii váldán sámi beroštumiid, luonddu- ja birasorganisašuvnnaid iige stáhta iežas fágaorgánaid oaiviliid, mat leat dorjon Sámedikki fuolastumiid.

Sámediggi deattuha ahte doaibmabijus leat stuorra negatiivvalaš váikkuhusat guoskevaš orohagaide ja sámi beroštumiide.

– Mii doarjut sin ollásit áiggi ovddas guvlui, dadjá sámediggeráđđi Silje Karine Muotka.

Sámedikkis lea dievasčoahkkin boahtte vahkus. Nussir ášši ii leat áššelisttas, muhto sáhttá váldojuvvot áššin jos áirasiid eanetlohku dan háliida.

– Mun oainnán ahte ii leat eahpevejolaš ahte Sámediggi buktá cealkámuša dán mearrádussii, dadjá sámediggepresideanta Aili Keskitalo loahpas.

Gažaldagaide vástida dahje addá jearahallama, váldde oktavuođa sámediggepresidentii Aili Keskitalo +47 971 29 305 aili.keskitalo@samediggi dahje sámediggeráđđái Silje Karine Muotka, + 47 984 87 576, silje.karine.muotka@samediggi.no

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!