PRD: Arctic Indigenous Design Archives 2 oažžu doarjaga Sámedikkis

Sámediggeráđđi lea juolludan 150 000 ruvnno AIDA 2-prošektii, mii lea Sámi allaskuvlla, Suoma Sámi arkiivva ja Ruoŧa Ájtte musea searveprošeakta.

Ođas | Almmuhuvvon

Sámi allaskuvla, Sámi arkiiva Anáris ja Ájtte musea Johkamohkis leat 2017 rájes 2019 rádjai čađahan Interreg-prošeavtta AIDA – Arctic Indigenous Design Archives ja háliidit joatkit huksemis dán prošeavtta ala, golmma jagi prošeavttain, maid gohčodit AIDA 2.

AIDA ulbmil lea ásahit duojáriid ja dáiddáriid arkiivva, vai sáhttá seailluhit ja gaskkustit viidáseappot sámi hábmenmáhtu. Prošeavtta olis leat vurken materiála mii čoaggana duodjeproseassain, nugo tevnnegiid, bargogeahččalemiid, govaid, reivviid ja márkanfievrredanmateriála.

Duojár-arkiivvat geavahuvvojit Sámi allaskuvlla duodjeoahpahusas. Sámi allaskuvlla studeanttaide arkiivvat ja musea doibmet movttiidahtti oahppangáldun, mas oahpásmuvvet árbevirolaš duodjái, duojáriid persovdnahistorjái ja maiddái ohppet muitalit iežaset hábmenjurddašeamis digitálalaččat.

Dál prošeakta joatkašuvvá Sámedikki doarjagiin, ja prošeaktajođiheaddjin lea duodjeprofessora Gunvor Guttorm. AIDA 2 galgá deattuhit innovašuvnna duoji ja arkiivvaid vuođul, seammás go galggaše čalmmustahttit bohtosiid ođđa vugiiguin. Prošeavttas háliidit dahkat bargovugiid eanet álgoálbmotlágážin, mii mearkkaša ahte áigot heivehit daid sámi áddejupmái ja geavahussii.

– Lea hui vuogas go ovttasbargu ásahusaid gaskkas ovddida sámáidahttima sin doaimmain, seammás go lea konkrehtalaš ávkin sámi duojáriidda, dadjá sámediggepresideanta Aili Keskitalo (NSR).

AIDA 2 galgá čađahuvvot golmma ceahkis. 2020:s AIDA 2 vuoruha hábmema ja ovttasbarggu aktevrraiguin. 2021:s sii buokčalit álgoálbmotarkiivvaide, kurateremii ja heiveheapmái. 2022:s deattuhit innovašuvnna ja ođđa duodjevejolašvuođaid ásaheami.

– Lea dehálaš ođasmahttit duoji duodjeinnovašuvnnaid bokte. Eandalii lea dehálaš ahte duojárat dál besset ávkkástallagoahtit innovašuvnnas ja bargat olahit ođđa boahtteáigásaš márkaniid, dadjá sámediggeráđđi Silje K. Muotka (NSR).

Doarjja lea juolluduvvon doarjjaortnegis Regionálaovddideapmi.

Jearahallama addá sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no

 

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!