NASCO lea North Atlantic Salmon Conservation Organization, organisašuvdna stáhtaid várás mat hálddašit luondduluosa. Norgga ja Suoma beale sámedikkit leat áidna main lea áicistáhtus NASCO:s dan olis go lea álgoálbmotparlameanta. Norggas lea Norgga meahcásteddjiid- ja guolásteddjiidsearvvis, Boanddaidsearvvis ja WWF:s áicistáhtus.

– Dán jagi sešuvnnas bidjá Sámediggi fuomášumi mearraluossabivdiid dillái go das dađistaga gáržžiduvvojit bivdoáiggit, mii váldit ovdan gieskat šiehtaduvvon šiehtadusa rájárasttideaddji luossabivddus Deanujogas ja mii váldit ovdan hástalusaid luossabiebmanrusttegiid birra mat lassánit dađistaga ja váikkuhusaid luonddulussii sámi guovlluin, cealká Sámedikki presideanta Aili Keskitalo.

Sámedikki dievasčoahkkin celkkii juo 2012:s ahte lea dárbu heivehit álgoálbmotdimenšuvnna riikkaidgaskasaš luossaovttasbarggus NASCO:s. Sámediggi ozai ja oaččui áicistáhtusa NASCO:s seamma jagi ja lei vuosttaš gearddi ovddastuvvon áicin 2013:s. Dán jagáš sešuvdna lea geassemánu 12.- 15. b. Porlanddas, Maines, USA:s.

– Sámedikki bargun lea fuolahit ahte álgoálbmotvuoigatvuođat dollojuvvojit ja ahte sámi beroštumit deattuhuvvojit sihke regulerenbarggus dáppe ruovttus ja go Norga ovttasdoaibmá eará stáhtaiguin hálddašanáššiin, dadjá Sámedikki presideanta Aili Keskitalo.

NASCO ovttasbarggu bokte bidjet bealit láidestusaid movt luossaresursa galgá hálddašuvvot. Dát guoská álgoálbmogiidda geain lea luossabivdu oassin sin ávnnaslaš kulturvuođus. Sámediggeráđđi háliida ahte álgoálbmotoaidnu galgá ollu eanet leat oidnosis riikkaidgaskasaš proseassain.

– Mii háliidat bidjat fokusa dasa ahte álgoálbmotoaidnu oainnusmahttojuvvo NASCO:s. Mii háliidat ahte NASCO dohkkeha árbedieđuid ja árvvus atná álgoálbmogiid vuoigatvuođaid luondduluosa hálddašeamis, dadjá Sámedikki presideanta Aili Keskitalo.

Jus áiggut jearahallama, váldde oktavuođa sámediggepresideanttain Aili Keskitalo, +47 971 29 305

Govaid Keskitalos gávnnat dáppe. Daid oažžu friddja geavahit go kreditere govvejeaddji.

Gávdnet go dan maid ohcet?

Hva lette du etter? Din tilbakemelding hjelper oss ålage bedre nettsider.

Takk for din tilbakemelding!